منو
بهشت زهرا
عزیزلریمین تئهرانداکی قبری باشیندا
اؤلمه‌دیم ائی تانری چوخ شۆکور سنه،
بیر عؤمور آیریلیق دردینی گؤردوم.
آتا، کندیمیزده تاپمادیم سنی،
«بئهیشتی-زهرا»دا قبرینی گؤردوم.
باش‌داشین یوخ ایدی سینه‌داشینا،
آخیتدیم گؤزومده یاش گیله-گیله.
نه ائتمک طالعیین حؤکمو بئله‌یمیش،
بوردا گؤروشئیدیک گرک سنینله.
دئمیشدین من سنسیز اؤله بیلمرم،
من ده اینانمیشدیم بو حقیقته.
من کی، دئمه‌میشدیم گله بیلمرم،
دئ، کیم ایناناردی بئله غۆربته.
اجلمی غفلتاً حاقلادی سنی؟
یا وئردیگین وعدی تئز اونوتموسان،
وۆقاری دۆنیایا سؽغمایان آتام،
بو داشین آلتیندا نئجه یاتمیسان؟
او حسرت گؤزلرین یوللاردا قالدی،
بیر عؤمور دۆنیانین آجی‌سین داددین.
سلیم قؽشلاغیندا دۆنیایا گلدین،
«بئهیشتی-زهرا»دا تورپاقدا یاتدین.
بو غۆربت شهرده، بو غۆربت ائلده،
دئ نیه تک قویدون زهرا آنانی.
آیریلیق الینده قدّی اگیلن،
سنینله بیر یئرده اودا یانانی.
او، فانی دۆنیادا سنسیز قالمادی،
تک دؤزه بیلمه‌دی یقین فراقا.
گتیریب بئش آددیم سندن کناردا،
اونو تاپشیردیلار قارا تورپاغا.
سن گئتدین، آرخانجا آنام دا گئتدی،
اۆمیدیم قالمادی داها هئچ کیمه.
منیم ده عؤمرومون غۆروب چاغیندا،
یئتیملیگین توزو قوندو اۆستومه.
تک قالدیم غۆربتده...
دوستلار، تانیشلار،
ایچیمده قؤور ائدن دردی بیلمه‌دی.
دۆشوندوم تئهراندا دئدیلر یقین
آتانین یاسینا اوغول گلمه‌دی.
یولومو تیکانلی مفتیللر کسدی،
یولومو سیلاحلی آداملار کسدی.
منی دانلامایین الله عشقینه،
اؤزومون بو دردیم اؤزومه بسدی.
ایندی گلیب چؽخدیم بو دا بیر درددیر،
قبیر داشلارینا اگیلیر باشیم.
الیمده اولانلار الیمدن گئتدی،
داها سون تسلّیم، آخان گؤز یاشیم.
طالعییم بئله‌یمیش آتا، نه ائتمک،
سیزی سون منزیله یئتیرمه‌دیم من.
دۆنیانین (ایللرین) دردینی چینیمه آلدیم،
سیزین تابوتوزو گؤتورمه‌دیم من...
۱۹۹۲