تبریزله گؤروش

(40 ایل آیریلیقدان سونرا)

بیر ظۆلمت گئجه‌ده ایتیردیم سنی،
بیر آیدین گئجه‌ده تاپدیم تزه‌دن.
بلکه ده گؤزلریم آلدادیر منی،
بلکه بو گؤردوگوم هئچ سن دئییلسن؟

من بو آیریلیغا بیر عؤمور دؤزدوم،
ساچیم، ساققالیم دا آغارمیش تبریز.
هر یئرده، هر یاندا من سنی گزدیم،
آیریلیق نه یامان اولارمیش تبریز!

گزدیم آوروپانی، شرقی دولاندیم،
مین شهر گؤردومسه تبریز اولمادی.
گزدیم، نه یورولدوم، نه ده اوساندیم،
بو شرق گؤزلیندن بیر ایز اولمادی.

اؤزگه بیر جلالین وار ایدی سنین،
آغ بادام چیچگی آغ اؤرپگیندی.
دیللر ده گزیردی آدین، هۆنرین،
سؤیله، او ایللرین هاردادیر ایندی؟

گلدیم گؤروشونه، دئدیم خیالدی –
مرمر ائولر گوردوم اولدوزلار سانی.
بیر آندا قلبیمی هیجان آلدی،
بس منیم گؤردوگوم او تبریز هانی؟!

نئجه دوغما ایدی او کرپیج ائولر،
بو مرمر بینالار نئجه سویوقدور!
چاخ-چاخلی قاپیدان گؤرمه‌دیم اثر،
«اندرون-بیرون»لو حیطلر یوخدور.

قدیم کۆچه‌لرین چؽخمیر یادیمدان،
آخی، او یئرلرده آیاق ایزیم وار.
هاردادیر، لیلاوا، اهراب، مارالان؟
منیم خیالیمدا او تبریز یاشار.

* * *

بیلیرم یاماندیر حؤکمو زامانین،
سن ده زمانه‌نین حؤکمونه دۆشدون.
گؤر نئجه دگیشیب حالی دۆنیانین،
سن ده اللی ایلده بئله دگیشدین.
دئسم بیر آوروپا شهریسن سن،
یقین بو سؤزومدن اینجی‌یجکسن.
ایسترم نه لوندون، نه ده پاریس اول،
دونون دگیشسه ده قلباً تبریز اول.
سن اۆمید یئریمیز، آند یئریمیزسن،
مشروطه هارایلی شهریمیزسن.
دگیشمه قلبی‌نین حرارتینی،
اونوتما سردارین وصیّتینی.
اؤزونو، اصلینی اونوتما تبریز،
گله‌جک نسلینی اونوتما تبریز!
اونودا-اونودا اونودولموشوق،
«مۆهاجیر» اولموشوق، «قاچقین» اولموشوق.
گزیر اؤولادلارین دیاربادیار،
بیزیم نه غریبه طالعیمیز وار.
عؤمرون باهاریندا آیریلدیم سندن،
عؤمرون یورغون واختی تاپدیم تزه‌دن.
گئدیرم، حسرتیم سونا یئرمه‌دی،
گؤروشدوک، آیریلیق هله بیتمه‌دی.
منیمچین آلینماز قالاسان تبریز،
ایسترم تبریزتک قالاسان تبریز.

۱۹۹۳، تبریز