آغلایا-آغلایا گلدیم دۆنیایا،
دۆنیادان گئدنده
نه اۆزومده گؤز یاشیم اولاجاق
نه ده کیپریکلریمده نم.
بونو ایندیدن بیلیرم.
دوستلاریم، عزیزلریم آغلایاجاق یقین
دۆشهجک یادیما من ده،
آغلامیشام دۆنیایا گلنده.
کؤرپه گؤزلریمه
دۆنیا دیو گؤروندو، - آغلادیم.
اللریم بلهیه بۆروندو، آغلادیم.
دئدیلر خورتتان وار،
دامداباجا وار، آغلادیم.
ساققالی اؤزوندن اوزون قوجا وار آغلادیم.
آغلادیم، سسیمدن قورخدوم،
آغلادیم اؤزوم-اؤزومدن قورخدوم.
آغلادیم آیاقلاریمی یئره دؤیه-دؤیه،
آغلادیم، بو دۆنیایا گلدیم نیه؟
سونرا غضبیمی اودا-اودا،
هاوادان توتا-توتا.
قالخدیم آیاغا ...
دوردوم؛ گئتدیم ...
یؽخیلدیم، قالخدیم، گئتدیم ...
آنجاق بیلمهدیم هارا گئدیرم ...
آرخادا قالدی کؤرپهلیک ایللریم،
بئشیک یئریم، قونداق یئریم ...
آرزولاریم توتدو اللریمدن
بیر گۆن توخ اولدوم،
بیر گۆن قالدیم آج.
اوندا بیلدیم نهدیر احتیاج ...
سینهم دولو سؤز اولدو،
هر کسه دئیه بیلمهدیم.
غۆرورومدان اگیلمهدیم.
یاندیم اؤز ایچیمده،
یانان شمع کیمی.
اریدیم گیله-گیله،
کیچیلدیم گیله-گیله
اؤز ایچیمه چکیلدیم بیله-بیله.
شمع شمعداندا سؤنن کیمی،
بیلیرم سؤنرم من ده.
قالار ایچیمده
وطن حسرتی،
تبریز حسرتی.
نیگاران گئدرم دۆنیادان
اگر چکن اولماسا
منسیز حسرتی ... (من چکن حسرتی)
۱۹۹۱