بیر بندهنم بو دۆنیایا گلهلی،
اولو تانریم، بو بندهنه حیان اول.
سندن باشقا یوخ کیمسهیه اۆمیدیم،
اولو تانریم، بو بندهنه حیان اول.
بو دۆنیانین گردیشینه دولاندیم،
نه دئدیلر دوغرو بیلدیم، ایناندیم.
بو حیاتین یوللاریندا تالاندیم،
اولو تانریم، بو بندهنه حیان اول.
فلک منله دۆز گلمهدی، کس اولدو،
آرزولاریم، اۆمیدلریم هئچ اولدو.
طالعییمه یازیلانلار پوزولدو،
اولو تانریم، بو بندهنه حیان اول.
خبریم یوخ منسیز قالان ائلیمدن،
نه ائدیم کی، هئچ نه گلمز الیمدن.
بیر آن بئله آدین دۆشمز دیلیمدن،
اولو تانریم، بو بندهنه حیان اول.
بیر چینارام، اگیلمرم یئله من،
سینه گررم توفانا من، سئله من.
هر آن بونو گتیرهرم دیله من،
اولو تانریم، بو بندهنه حیان اول.
حیان اولسان آرزولاریم چین اولار،
گؤزلریمده بۆتون دۆنیا دورولار.
اۆرگیمده نئچه-نئچه آرزوم وار،
اولو تانریم، بو بندهنه حیان اول.
دیلیمدهدیر، تانری سؤزو، حاق سؤزو،
هر چتینی آسان ائدر حاق اوزو.
قیسمت اولا بیر ده گؤرم تبریزی،
اولو تانریم، بو بندهنه حیان اول،
سندن دیلک دیلهیهنه حیان اول.
۲۰۰۱