منو
تبریز
چوخ زامان کدرلی گؤرموشم سنی،
یادیندا وارمیدیر او حالین، تبریز؟!
ایندی او گۆنلردن اوزاقسان داها،
آرتیبدیر شؤوکتین، جلالین، تبریز!
بیر قۆدرت دویورام دوغما سسیندن،
سینه‌می قؽزدیردین گور نفسیندن.
حیات کیتابی‌نین صحیفه‌سیندن
سیلینیب حسرتین، ملالین، تبریز!
او گۆن کی، سینه‌نی سیپر ائیله‌دین،
قارانلیق گئجه‌نی سحر ائیله‌دین،
بیزه آزادلیغی خبر ائیله‌دین
سسینه سس وئردی ماحالین، تبریز!
من چوخدان وئرمیشم سنه قلبیمی،
ایسته‌سن آل بیر ده سینا قلبیمی،
قویما یاد اللرده سؽنا قلبیمی،
داها قاییتماسین زاوالین، تبریز!
بیزده مۆقدّسدیر آنانین آدی،
شاهلار، حؤکمودارلار بونو قانمادی.
هر ایل اوردو چکیب سنی تالادی،
آرتدی دردین، غمین، خیالین، تبریز!
اگر آتیلسا دا اودلارا یوردوم،
آنجاق اییلمه‌دی یادلارا یوردوم.
دؤزدو هر چتینه، هر دارا یوردوم.
یاردی قارانلیغی هیلالین، تبریز!
اوشاقکن دئدیلر آذر آناندیر،
اودلاردان دوغدوغوم ائله عیاندیر.
بیزه بؤهتان آتان یازی‌نی قاندیر،
جاوابسیز قالماییب سوالین، تبریز!
بو ائللر یانیندا آند ایچیرم من،
خالقین آرزوسودور قلبیمدن کئچن.
من ایلهام آلمیشام هر زامان سندن،
دۆنیالار قدردیر کمالین، تبریز!
تبریز، ۱۹۴۵