بعضاً اؤز-اؤزومه دۆشوندوکجه من،
خیاللار قلبیمی آلیر الیمدن،
دئییرم: من ده بیر عسگر اولایدیم.
نه اولا عؤمرومون بو گنج چاغیندا،
اودلار اؤلکهسینین گئن قوجاغیندا
گئنیش صحرالارا رهبر اولئیدیم.
دورئیدیم سرحدده الیمده تۆفنگ،
قارانلیق مایاق کیمی،
زامانلار کئچیرمیش قارلی داغ کیمی.
اؤپئیدی سینهمی یئللر هر سحر،
دۆشئیدی اۆستومه گۆلگون شفقلر،
گۆنشین رنگیندن آلایدیم مین رنگ.
قارانلیق گئجهنین قارا قلبینه
ترلان باخیشلاریم آخیب کئچئیدی،
گۆنشین رنگیندن آلایدیم مین رنگ.
قارتاللی داغلارین زیروهسینده من
بیر کئشیکچی کیمی دوراندا بعضاً،
دومانا، چووغونا گرئیدیم سینه.
منه طالعیینی تاپشیرارسا ائل،
اونو گؤزوم کیمی قورویارام، بیل.
نه نیشان، پاقون، نه جاه، نه جلال.
اگر اینانماسان اوخوجوم بونا،
بوز شینئل گئیهجک آزروغلونا
منجه آرزو اولسون، سنجه بیر خیال.
تبریز، ۱۹۴۳