اردبیلده شئیخ صفی مقبره‌سی اۆستونده

بئش قؽلینج واردی،
اونلار بئش دؤیوشدن،
بئش ظفردن یادیگاردی.
قؽلینجلار بئش ایگید کیمی
باش-باشا وئریب دوروردو.
فخر ائدیردی اونلارلا
شاه ایسماییل یوردو.
سحر گۆنشیله گؤروشور.
آخشام غۆروبوندا
شفقلری اۆفوقه دۆشوردو.
بو دؤرد یۆز یاشلی ایگیدلری
قوجالتمامیشدیر زامان
توفانلی روزیگار
اگیلیب کئچمیشدی یانلاریندان . . .
بیر یوردون، بیر میلّتین
باش اوجالیغی ایدی، او بئش قؽلینج
وطنین ظفر چاغی ایدی، او بئش قؽلینج.
قوجالار فخر ایله باخیردی
اؽگید بابامیز
شاه ایسماییلین یادیگارینا
جاوانلار حؤرمتله کئچیردی اؤنوندن
هر قؽلینج دۆشمنه گؤز داغی ایدی.
هر قؽلینج بیر دؤیوش بایراغی ایدی.
قؽزیلباش اوردوسونون وارلیغی ایدی.
بیر گۆن
خایین اللر قوپارتدی اونلاری.
اردبیلدن تئهرانا آپاردی اونلاری.
بیر میلّتین تاریخی
اونودولسون دئیه،
آتدیلار بیر موزئیده زیرزمی‌یه . . .
فقط اونوتدولار بونو
نه تاریخ، نه ده میلّت اونوتمایاجاق.
نه ایگید اوغلونو
نه ده قؽزیلباش اوردونو. . .
او بئش قؽلینج،
او بئش قلبدن نیشان
تاریخ اولوب
یاشایاجاق زامان-زامان . . .

۲۰۰۰