دهلی کؤنول حیاسیزا یار اولما
آختار ناموسوندان اوتانانی توت
چوخ چکیلمه قدرتلینین یانینا
گئت یاپیش قولوندان ناتوانی توت
کنار گزمه خلقین ايشینه قاریش
باجارسان دوشگونون قولوندان یاپیش
باجارا بیلمهسن نیش وورما ساویش
خنجر اولما مرهم اول یارانی توت
یالان شاهد اولوب بوتپرست اولما
هامیا پیس دئمه خودپرست اولما
اؤزون اوجا توتما چوخ دا پست اولما
اهل اندازه اول سن اورتانی توت
دده کاتب حق جانبین بوراخما
دوغرو گئت جادهنی یولوندان چیخما
ظالم قارشیسیندا حقّی دئ قورخما
سیغین بیر آللاها یارادانی توت.