تبعیض آتش ایله خلقی یاندیرما
تبعیض
انسان اوغلو عدالتدن دم ووران
عدالت باریندان خالیسان قارداش
تبعیض آتشی ایله خلقی یاندیران
عداوت طبلینی چالیسان قارداش
تبعیض بیر آتشدی قانونو یاخار
برق تک یاندیرار رعد تک چاخار
ملّت بیر-بیرینه آجیقلی باخار
آرایا عداوت سالیسان قارداش
یالان سؤزلر ایله خلقی قاندیرما
محبّت شیشهسین ووروب سیندیرما
آغویا دؤندرمه بالی، سن قارداش
قانون عدالتدی عدالت ائیله
اوتان وجدانیندان شرافت ائیله
تبعیضی آت، دوغرو قضاوت ائیله
باغلاما بنایا سئلی سن قارداش
تبعیض اهلی، اؤز دئدیگین دانارسان
لوچ گؤز کیمی بیری ایکی سانارسان
آفریقای جنوبینی قینارسان
یا کئفلیسن یادا دهلیسن قارداش
تبعیض اوره کلری یاخیب یارالار
طبقاتی بیر - بیریندن آرالار
تبعیض بیر آفتدیر یوخدو چارالار
حتما بو معنایا حالیسان قارداش
گر تبعیض اولماسا ملّت اچیشماز
بیر بیرینین ضررینه چالیشماز
آیدین اولار سو بولانیب قاریشماز
تاریخدن بیر عبرت آلیسان قارداش؟
بیر آز انصاف اولسون سنین قانیندا
مظلومو ساخلیسان قاپی دالیندا
ظالملری اوتوردورسان یانیندا
دانیشیب اوزونه گولورسن قارداش
غافل اولما مکافات عملدن
حق تقدیر ائیلهین روز اجلدن
بسدی اوسان بو افعال دغلدن
سوندا پیس گونلره قالیرسان قارداش
دده کاتب خسته کؤنلوم قوجادیر
بیر واخت گوندوز اولور بیر واخت گئجهدیر
آللاه الی هر بیر الدن اوجادیر
قورآن اوخویوبسان بیلیرسن قارداش.