دهلی کؤنول بؤلگو بؤلن خوش بؤلوب
باشین چیخماز هر خرمنی سووورما
یارادان یارادیب تانیر بندهسین
حکمته قاریشما عنادا دورما
داغ داغا یئتیشمز انسانلار چاتار
بچّه گرگ بسلهمه زحمتین باتار
قدیم سؤزدور چؤرهک وئرهنی توتار
نانکورا نان وئرمه، سن اؤزون یورما
سن سویوقدا یازیق دئمه ایلانا
جانی قیزسا رحم ائلهمز انسانا
گؤرودن اود ووروبلار افعی ایلانا
قوی آلیشسین او آتشی سووورما
دده کاتب دردین یئتر علاجا
وارین اولسا ياردیم ائله محتاجا
آج قارین دویوران گئدر معراجا
دویسا قاپار هر آجیدا دویورما.