منو
اوزون قوجا اوغلو سَیرَک بویو
اوغوزلارین زامانین‌دا اوشون قوجا دئییلن بیر کیشی واردی. اؤولاددان
ایکی اوغلو واردی. بؤیوک اوغلونون آدی ایرک ایدی. پهلوان، جسور یاخشی بیر
ایگید ایدی. هاچان ایسته‌سه، باییندیر خانین دیوانینا گئدیب-گلیردی. بیلربیی
اولان قازانین دیوانین‌دا اونون اۆچون قاپی-باجا یوخ ایدی.
بیلری آشاغی باش‌دا قویوب، قازانین لاپ اؤنون‌ده اوتوروردو.
هئچ کیمه قایناییبقاریشمیردی.
خانیم، یئنه بیر گۆن ایرک بیلری قویوب یوخاری باشا کئچن‌ده
ترسوزامیش دئییلن بیر اوغوز ایگیدی دئدی: «آی اوشون قوجانین اوغلو، بو
اوتوران بیلر هر بیری اوتوردوغو یئری قؽلینجی ایله، چؤریی ایله آلیب‌دیر.
ایه، سن باش‌می کسدین، قان‌می تؤکدون، آجمی دویوزدوردون، یالین آدام‌می
گئییندیردین؟».
ایرک دئییر: «آی ترسوزامیش، باش کسیب-قان تؤکمک هۆنردیرمی؟».
دئدی: «بلی، البته، هۆنردیر!». ترسوزامیشین سؤزو ایره‌یه تأثیر ائل‌دی.
دوردو قازان بی‌دن یۆروش اۆچون ایجازه ایسته‌دی. اذن وئریل‌دی. چاغیردیلار،
دؤیوش‌چولر یؽغیل‌دی. اۆچ یۆز نیزه‌لی سئچمه ایگید ایریین یانین‌دا جملش‌دی.
مئیخانادا بئش گۆن یئمک-ایچمک اولدو. اوندان سونرا شیروکوز کنارین‌دان
گؤیجه دنیزدک ساحه‌نی چالیب-تالادیلار. بؤیوک غنیمت الده ائتدیلر.
ایریین یولو الینجه قالاسینا دۆش‌دو. قارا تکور اورادا بیر قوروق دۆزلتدیرمیش‌دی.
قوشلاردان بو دایره‌یه قاز، تویوق؛ حیوانلاردان کئییک،
دووشان دولدوروب، بورانی اوغوز ایگیدلری اۆچون تله ائتمیش‌دی.
اوشون قوجا اوغلونون دا یولو بو قوروغا دۆش‌دو. قوروغون قاپی‌سینی
سؽندیردیلار. سؽغین-کئییک، قاز-تویوق قؽردیلار؛ یئدیلر-ایچدیلر. آتلارینین
یهرلرینی گؤتوردولر، اؤز گئییملرینی چؽخاردیلار.
قارا تکورون جاسوسو واردی، بونلاری گؤردو. گلیب دئییر: «آیا، اوغوزلاردان
بیر بؤلوک آتلی گل‌دی. قوروغون قاپی‌سینی سؽندیردیلار، آتلارینین یهرینی
گؤتوروب، گئییملرینی چؽخارت‌دیلار. اده، نه دورورسوز؟»
آلتی یۆز قارا دون‌لو کافیر بونلارین اۆزرینه هۆجوم ائتدی. ایگیدلری
قؽردیلار، ایریی توت‌دولار. الینجه قالاسین‌دا زین‌دانا سال‌دیلار.
اوجا-اوجا داغلاردان، آشقین-داشقین سولاردان خبر کئچ‌دی. قالین اوغوز
ائللرینه خبر چات‌دی. اوشون قوجانین هۆندور ائوی اؤنون‌ده شیون قوپ‌دو.
قازا بنزر قؽزی-گلینی آغ چؽخاریب قارا گئی‌دی. اوشون قوجا ایریین آغجا
اۆزلو آناسی ایله «اوغول، اوغول!» – دئیه هؤنکورتو ایله آغلاش‌دیلار.
ییه‌سی اولان بؤیویور، قابیرغالی بوی آتیر. دئیی‌لنه گؤره، خانیم،
اوشون قوجانین کیچیک اوغلو سَیرَک یاخشی، پهلوان جثّه‌لی جسور بیر ایگید
اولدو. بیر گۆن یولو بیر یؽغینجاغا دۆش‌دو، اوتوردولار. یئییب-ایچدیلر.
سَیرَک سرخوش اولدو. باییرا – آیاق یولونا چؽخ‌دی. گؤردو کی، یئتیم بیر
اوغلان بیر قؽزلا دالاشیر. «ایه، سیزه نه اولوب؟» – دئیه بیر شیلله بیرینه، بیر
شیلله ده او بیرینه ووردو. کؤهنه دونون بیتی، یئتیم اوغلانین دیلی آجی اولار.
یئتیم دئدی: «ا، بیزیم یئتیملییمیز بس دئییل؟ بیزی نیه وورورسان؟ هۆنرین
وارسا، قارداشین الینجه قالاسین‌دا اسیردیر، گئت اونو خلاص ائله!».
سَیرَک دئدی: «اده، قارداشیمین آدی ندیر؟». دئدی: «ایرک‌دیر».
سَیرَک اؤز-اؤزونه دئدی: «ایره‌یه سَیرَک یاراشیر؛ قارداشیم ساغمیش،
داها فیکیر ائلمرم. قارداش‌سیز اوغوز ائلین‌ده دورمارام. قاران‌لیق چؤکموش
گؤزلریمین ایشیغی قارداش!» – دئییب آغلادی. ایچرییه – مجلسه گل‌دی.
اوتورانلاردان ایجازه ایسته‌دی. «بیلر، سالامات قالین!» – دئدی. آتینی گتیردیلر،
مین‌دی؛ چاپیب آتاسینین ائوینه گل‌دی. آتین‌دان دۆش‌دو. آناسینین دیلینی
آراییب، بیر سؤز ائشیتمک ایسته‌دی. سَیرَک بورادا گؤرک نه سویلامیش، نه
سویلاییب دئمیش‌دیر:
قالخاراق، آی آنا، یئریم‌دن دوروب
قارایال‌لی گؤزل قازلیق آتی‌می میندیم.
چارپاز یاتان آلا داغین
اتیینه گئتدیم.
قالین اوغوز ائلین‌ده بیر مجلس وارمیش،
اورا دۆشدوم.
یئمک-ایچمک واختی آغ-بوز آتلی
بیر چاپار گل‌دی.
دئدی، «ایرک» آدلی بیر ایگید چوخ‌دان اسیر ایدی،
اللهین کمکیله دوستاق‌لیق‌دان چؽخیب گلیب.
بؤیوک-کیچیک قالماییب؛
هامی گئت‌دی او ایگیدین قارشی‌سینا.
آنا، من ده گئدیم‌می، نه دئییرسن؟
آناسی بورادا سویلامیش، گؤرک، خانیم، نه سویلامیش‌دیر:
آغزین اۆچون اؤلوم، اوغول!
دیلین اۆچون اؤلوم، اوغول!
قارشی‌داکی اوجا داغین یؽخیلمیش‌دی،
اوجال‌دی آخیر!
جوشغون آخان گؤزل سویون قوروموش‌دو،
چاغلادی آخیر!
ایری آغاج‌دا قول-بوداغین قوروموش‌دو،
جۆجریب گؤیردی آخیر!
قالین اوغوز بیلری ایله سن ده گئت، اوغول!
او ایگیده چاتان کیمی آغ آتین‌دان ائن، اوغول!
الله گؤروش، او ایگیده سلام وئر،
الینی اؤپوب، بوینونو دا قوجاقلا!
اوجا داغیمین باشیسان، سؤیله!
نه دورموسان، اوغول، آتینی چاپ، گئت!
اوغلان آناسینا سویلامیش، گؤرک، نه سویلاییب دئمیش‌دیر:
آنا، آغزین قوروسون!
آنا، دیلین چۆروسون!
منیم اؤز قارداشیم وارمیش،
یولوم‌دان قاییتمارام!
اوغوز ائلین‌ده قارداش‌سیز دورمارام!
آنا حاقی تانری حاقی اولماسای‌دی،
بؤیوک ایتی پولاد قؽلینجی‌می گؤتورردیم،
بیرجه آندا گؤزل باشینی کسردیم،
آغ قانینی یئر اۆزونه تؤکردیم،
آنا، ظالم آنا!
آتاسی دئییر: «یانلیش خبردیر، اوغول. قاچیب گلن سنین بؤیوک قارداشین
دئییل، آیری‌سی‌دیر. منیم کیمی آغ ساققال‌لی آتانی آغلاتما! قوجالمیش
آنانی اینلتمه!» اوغلان بورادا سویلاییب دئمیش‌دیر:
اۆچ یۆز آلتمیش آلتی ایگید اووا چؽخ‌سا،
کئییک سۆروسو اۆستون‌ده های-کۆی قالخ‌سا،
قارداش‌لی ایگیدلر ایناملا قالخیب وورور.
قارداش‌سیزین انسه‌سینه یومروق وورسالار،
آغلادیقجا دؤرد یانینا باخیب دورور،
گؤزلرین‌دن دایانمادان آجی یاشلار آخی‌دیر.
آلا گؤزلو اوغلونوزلا گؤروشندک
بی بابا، خانیم آنا، سالامات قالین!
آتا-آنا «یانلیش خبردیر، گئتمه، اوغول!» – دئدیلر. اوغلان: «منی
یولوم‌دان ائلمیین. قارداشیم توتولان قالایا گئتمیینجه، اونون اؤلو یا
دیری اولدوغونو بیلمیینجه، اؤلوب‌سه، قانینی آلمایینجا قالین اوغوز ائلینه
قاییتمارام!» – دئدی.
آتا-آنا آغلاشیب قازان اۆچون آدام سال‌دیلار. «اوغلان قارداشینی یادا
سالیب گئدیر. بیزه نه مصلحت وئریرسن؟» – دئدیلر. قازان دئییر: «آیاغینا
ات توشاغی وورون!».
نیشان‌لی‌سی واردی، تئز یؽر-یؽغیش ائدیب، سیریی ائولندیردیلر. آتدان
آیغیر، دوه‌دن بوغرا، قویون‌دان قوچ کسدیردیلر. اوغلانی گلین اوتاغینا
سال‌دیلار. قؽزلا یورغان-دؤشه‌یه گیرن‌ده اوغلان قؽلینجینی چؽخاردی، قؽزلا اؤزو
آراسین‌دا قوی‌دو. قؽز دئدی: «قؽلینجینی قؽنینا قوی، ایگید، موراد وئر، موراد
آل، بیر-بیریمیزه ساریلاق!». اوغلان دئدی: «آی یاراماز قؽزی، قارداشیمین
اۆزونو گؤرمیینجه، اؤلموش‌سه، قانینی آلمایینجا مورادیما چاتسام، قوی
قؽلینجیملا دوغرانیم، اوخوما سانجیلیم، اوغلوم دوغولماسین، دوغولارسا اون
یاشینا چاتماسین!». دئدی و آیاغا دوردو، تؤوله‌دن بیر شاهانه آت چؽخاردی،
یهرله‌دی، دؤیوش پالتارینی گئیین‌دی. دیزلرینه، قوللارینا زیرئه قاپاقلار
باغلادی. دئدی: «قؽز، سن منیم اۆچون بیر ایل یولا باخ! بیر ایلده
گلمسم، ایکی ایل باخ! ایکی ایلده گلمسم، اۆچ ایل باخ! گلمسم، او واخت
بیل کی، اؤلموشم. آیغیر آتی‌می کسدیریب، ائهسانی‌می وئر! گؤزون کیمی توتارسا،
کؤنلون کیمی سئورسه، اونا گئت!». قؽز بورادا سویلامیش، گؤرک، خانیم،
نه سویلامیش‌دیر:
ایگیدیم، من سنی بیر ایل گؤزلرم،
بیر ایله گلمسن، ایکی ایل گؤزلرم.
ایکی ایله گلمسن، اۆچ-دؤرد ایل گؤزلرم.
دؤرد ایل یوخ، بئش-آلتی ایل گؤزلرم.
آلتی یولون آیریجین‌دا چادیر قورارام،
گئدن‌دن-گلن‌دن خبر سوروشارام.
خئییر خبر گتیرنه آت، دون وئررم،
قافتانلار گئیدیررم.
شر خبر گتیرنین باشینی کسرم.
ائرکک بیر میلچک ده سینمه قوندورمارام.
موراد وئریب، موراد آل، سونرا گئت، ایگیدیم!
اوغلان دئییر: «آی یاراماز قؽزی، قارداشیمین باشینا آند ایچمیشم،
دئدییم‌دن دؤنمرم!».
قؽز اؤز-اؤزونه دئییر: «منه قدمی اوغورسوز گلین دئیینجه،
اوتانماز-آرسیز گلین دئسینلر. قاییناتاما، قاییناناما خبر وئریم
گرک». سویلامیش، گؤرک نه دئمیش‌دیر:
آتام‌دان یاخشی قاییناتا!
آنام‌دان یاخشی قایینانا!
قایتابانین بوغراسی اۆرکوب گئدیر،
ساروان اؤنونو آلدی، دؤندره بیلمیر،
قاراجیق آیغیرین اۆرکوب گئدیر،
ایلخی‌چی اؤنونو آلدی، دؤندره بیلمیر.
یایلاغین قوچلاری اۆرکوب گئدیر،
چوبان اؤنونو آلدی، دؤندره بیلمیر.
آلا گؤزلو اوغلون قارداشینی آنیب گئدیر،
آغجا اۆزلو گلینین دؤندره بیلمیر،
سیزه معلوم اولسون!
آتا-آنا آه ائتدیلر، یئرلرین‌دن قالخ‌دیلار. «اوغول، گئتمه!» – دئدیلر.
گؤردولر، چاره اولمادی. اوغلان «قارداشیم توتولان او قالایا گئتمه‌یه
بیلمرم!» – دئدی. آتا-آناسی: «گئت، اوغول. یولون اوغورلو اولسون! گئدیبقاییتماق
قیسمتین‌ده وارسا، ساغ سالامات گئدیب گلسن!» -دئدیلر.
ایرک آتا-آناسینین الینی اؤپدو. سؽچراییب قاراجیق آتینا مین‌دی.
گئجنی گۆندوزه قاتیب آتینی چاپ‌دی. اۆچ گۆن گئجه‌لی-گۆندوزلو آت چاپ‌دی.
درشام سرحدین‌دن کئچیب، او قارداشینین توتولدوغو قوروغا گل‌دی.
گؤردو کی، ایلخی‌چی کافیرلر دای گۆدورلر. قؽلینج چکیب آلتی کافیری یئره سردی.
آتلا فؽرلانیب دایلاری اۆرکوت‌دو؛ قوووب همین قوروغا سال‌دی. اۆچ گۆن گئجگوندوز
آت چاپمیش یورغون ایگیدین گؤزلرینی یوخو باس‌دی. سَیرَک آتینین
یۆینینی بیلیینه باغلادی، یاتیب یوخویا گئت‌دی.
کافیرین جاسوسو واردی. گلیب تکورا دئدی: «اوغوزدان بیر دلی ایگید
گل‌دی. ایلخی‌چیلاری اؤلدوردو، دایلاری اۆرکوت‌دو-قوودو، گتیریب قوروغا سال‌دی».
تکور دئییر: «آلتمیش یاراق‌لی آدام سئچین؛ گئت‌سینلر، توتوب
گتیرسینلر».
آلتمیش یاراق‌لی آدام سئچیب گئت‌دیلر. گؤزلنیلمه‌دن آلتمیش دمیر
دون‌لو کافیر اوغلانین اۆزرینه گل‌دی. سیریین میندیی آیغیر یاخشی آتلاردان‌دی؛
آت قولاغی تئز ائشیدر. آتلارین کیشنرتی‌سینی، گئییم-کئجیملرین قؽجیلتی‌سینی
ائشی‌دن آیغیر چکیب اوغلانی اویات‌دی. اوغلان گؤردو کی، بیر آلای آتلی
گلیر، یئرین‌دن سؽچرادی. آدی گؤزل محمده سالاوات چک‌دی. آتینا
مین‌دی. قارادون‌لو کافیرلری قؽلینجلاییب، قالایا سال‌دی. یئنه یوخوسون‌دان
ال چکه بیلمه‌ییب یئرینه گئت‌دی، یات‌دی. یئنه آتینین یۆینینی بیلیینه
کئچیرت‌دی.
کافیرلرین ساغ قالانلاری قاچاراق تکورون یانینا گل‌دیلر. تکور
دئییر: «تفو، اۆزونوزه! آلتمیش آدام بیر اوغلانی توتا بیلمدینیز!». بو
دفعه اوغلانین اۆزرینه یۆز کافیر گل‌دی. آیغیر یئنه اوغلانی اویات‌دی. سَیرَک
گؤردو کی، بیر آلای آتلی گلیر. دوردو، آتینا مین‌دی. آدی گؤزل محمده
سالاوات چک‌دی. کافیرلری قؽلینج‌دان کئچیریب قالایا باس‌دی؛ آتینی دؤندریب،
یئنه اؤز یئرینه گل‌دی. یوخوسو گل‌دی، یئنه یات‌دی. آتینین یۆینینی یئنه
بیلیینه کئچیردی. بو دفعه آت اوغلانین قولون‌دان آچیلیب قاچ‌دی...
کافیرلر یئنه تکورون یانینا گل‌دیلر. تکور دئییر: «بو دفعه اۆچ
یۆز آداملا گئدین!».
کافیرلر دئدی: «گئتمیریک، کؤکوموزو کسیب، هامیمیزی قؽرار!».
تکور دئییر: «بس نئجه ائلیک؟ گئدین او دوستاق ایگیدی چؽخاریب گتیرین.
«تپینین کؤپونو سۆسین یاتیرار». آت وئرین، گئیین‌دیرین!».
گل‌دیلر، ایره‌یه دئدیلر: «ایگید، تکور سنین گۆجونه-غیرتینه سؽغین‌دی.
بورادا بیر دلی ایگید یولچونون-دیلنچینین، چوبان-چولوغون چؤریینی
الین‌دن آلیر. توت او ایگیدی اؤلدور، سنی آزاد ائلیک، چؽخ گئت!». ایرک
«یاخشی، اولسون!» – دئدی.
ایریی زین‌دان‌دان چؽخاردیلار. ساچ-ساققالینی اۆلگوجله‌دیلر. بیر آت، بیر
قؽلینج وئردیلر. اۆچ یۆز کافیری ده اونا یولداش کیمی قوش‌دولار. سیریین
اۆزرینه گل‌دیلر. اۆچ یۆز کافیر کناردا دوردو.
ایرک دئییر: «هانی او دلی ایگید؟». اوزاق‌دان گؤستردیلر. ایرک
دئییر: «گلین گئدک، توتاق!». کافیرلر دئییر: «تکور سنه امر ائله‌ییب،
سن گئت!». ایرک دئییر: «اودور، یاتیر، گلین گئدک!». کافیرلر دئییر:
«های-های، نه یاتماق، قولتوغونون آلتین‌دان باخیر. قالخار، گئن دۆنیانی
باشیمیزا دارالدار». ایرک دئدی: «ایندی من گئدیم، ال-آیاغینی باغلاییم،
اوندان سونرا سیز گلرسیز». سؽچراییب کافیرلرین آراسین‌دان چؽخ‌دی.
آتینی سۆروب، سیریین اۆزرینه گل‌دی. آتین‌دان دۆشوب، یۆینی بیر بوداغا
ایلیشدیردی. باخ‌دی گؤردو کی، بو جاوان اون دؤرد گئجه‌لیک آیا بنزییر. بو
گؤزل، آلا گؤزلو گنج ایگید پوچور-پوچور ترله‌ییب یاتیر. گلن‌دن-گئدن‌دن
خبری یوخ‌دور. ایرک دولانیب، جاوانین باشی اوجونا گل‌دی. گؤردو
کی، بئلین‌ده قوپوزو وار. چؽخاریب الینه آلدی. سویلامیش، گؤرک، خانیم،
نه سویلامیش-دئمیش‌دیر:
قالخاراق یئرین‌دن دوران ایگید،
قارایال‌لی گؤزل قازلیق آتی مینن،
آرقوبئ‌لی، آلا داغی گئجه آشان،
جوشقون آخان گؤزل سویو اۆزوب کئچن،
غریب‌لییه گلن بئله یاتارمی؟
منیم کیمی قوللارینی، اللرینی
باغلاداراق دونوز دامین‌دا یاتارمی؟
آغ ساققال‌لی آتاسینی، آغ بیرچک‌لی آناسینی
اینلدرمی، آغلادارمی؟
نیه یاتیرسان، ایگید؟
قافیل اولما، گؤزل باشینی قال‌دیر، ایگید!
آلا گؤزلرینی آچ، ایگید!
الله وئرن شیرین جانینی یوخو آلمیش،
ایگید، اللرینی قوللارین‌دان باغلاتما!
آغ ساققال‌لی آتانی، قاری آنانی آغلاتما!
قالین اوغوزدان گلن ایگید، نئجه ایگیدسن؟
سنی یارادان حاقی اۆچون دوروب گل!
دؤرد یانینی کافیر توتوب‌دور بیل!
اوغلان گرنشیب آیاغا دوردو. قؽلینجینین دستیین‌دن یاپیش‌دی کی، اونو
وورا، گؤردو کی، اونون الین‌ده قوپوز واردیر. دئدی: «آی کافیر، دده‌م
قورقودون قوپوزونا حؤرمت ائدیب وورمادیم. اگر الین‌ده قوپوز اولماسای‌دی،
قارداشیمین باشینا آند اولسون، سنی ایکی پارا ائدردیم. سَیرَک بورادا
چکیب قوپوزو اونون الین‌دن آلدی، سویلادی، گؤرک، خانیم، نه سویلادی:
صبح تئزدن یئریم‌دن دورماغیم قارداش اۆچون‌دور،
آغ-بوز آتلاری یورماغیم قارداش اۆچون‌دور.
قالانیزدا دوستاق وارمی، کافیر، دئ منه؟!
دردلی باشیم قوربان اولسون، کافیر سنه!
بؤیوک قارداشی ایرک بورادا سویلامیش، گؤرک، خانیم، نه سویلامیش‌دیر:
آغزین اۆچون اؤلوم، قارداش!
دیلین اۆچون اؤلوم، قارداش!
یئرینی-یوردونو سوروشسام، نه یئردیر؟
قاران‌لیق‌دا آزیب، یول آراسان،
اۆمیدین نیه‌دیر؟
بؤیوک بایراق گؤتورن خانینیز کیم‌دیر؟
دؤیوش گۆنو اؤنده دوران ایگیدینیز کیم‌دیر؟
ایگید، سنین آتان کیم‌دیر؟
ایگید آدامین ایگیددن آد گیزلتمه‌سی عیب‌دیر،
ایگید، سؤیله، آدین ندیر؟
بیر داها سویلاییب دئمیش‌دیر:
قایتابانی‌می گۆدن ساروانیمسان‌می؟
قاراجیق آتی‌می گۆدن ایلخیچیمسان‌می؟
یایلاغی‌می گۆدن چوبانیمسان‌می؟
قوللوغوم‌دا دایانان نایبیمسن‌می؟
بئشیک‌ده قویوب گئتدییم قارداشیمسان‌می؟
ایگید، سؤیله منه!
دردلی باشیم قوربان اولسون بو گۆن سنه!
سَیرَک بورادا بؤیوک قارداشینا سویلاییب دئدی:
قارا دؤوران‌دا یول آزسام، اۆمیدیم الله‌دیر،
بؤیوک بایراق گؤتورن خانیمیز باییندیر خان‌دیر!
دؤیوش گۆنو اؤنده دوران ایگیدیمیز سالور قازان‌دیر!
آتامین آدینی سوروشورسان، اوشون قوجادیر!
منیم آدی‌می بیلمک ایستسن، سَیرَک‌دیر!
قارداشیم وارمیش، دئییرلر، آدی ایرک‌دیر!
بیر داها سویلاییب دئمیش‌دیر:
قایتابانینی گۆدن ساروانینام،
قاراجیق آتینی گۆدن ایلخیچینام.
بئشیک‌ده قویوب گلدیین قارداشینام.
بؤیوک قارداش ایرک بورادا سویلامیش، گؤرک، خانیم، نئجه سویلاییب
دئمیش‌دیر:
آغزین اۆچون اؤلوم، قارداش!
دیلین اۆچون اؤلوم، قارداش!
ارمی، ایگیدمی اولدون، قارداش!
غریب‌لییه قارداشین اۆچون سن‌می گلدین، قارداش؟
ایکی قارداش قالخیب قوجاقلاشیب گؤروش‌دولر. ایرک کیچیک قارداشینین
بوینونو اؤپدو. سَیرَک ایسه بؤیوک قارداشینین الینی اؤپدو.
قاباق طرف‌دن کافیرلر باخیشیب دئییرلر: «دئیسن، گۆلش‌دیلر؟
کاش کی، بیزیمکی باس‌سین!». گؤردولر کی، قوجاقلاشیب گؤروش‌دولر، قازلیق
آتلارینی مین‌دیلر.
ایکی قارداش قارا دون‌لو کافیرلرین اۆستونه آت سۆروب قؽلینج چال‌دی؛ اونلاری
قؽریب چات‌دیلار، قوووب قالایا سال‌دیلار. سونرا گلیب همین قوروغا گیردیلر.
آتلاری باییرا چؽخاردیلار. هرلدیب-فؽرلادیب آتلاری قاباقلارینا قات‌دیلار.
درشام سویونو اۆزوب کئچ‌دیلر. گئجنی گۆندوزه قاتیب، اوغوز یوردونون
سرحدینه یئتیش‌دیلر.
سَیرَک قان‌لی کافیرلرین الین‌دن قارداشینی خلاص ائتدی. آغ ساققال‌لی
آتاسینا موشتولوق‌چو گؤندردی. «آتام قاباغیما گل‌سین!» – دئدی.
اوشون قوجانین قاپی‌سینا چاپار گل‌دی: «موشتولوق! گؤزون آیدین!
اوغوللارینین ایکی‌سی ده بیرلیک‌ده ساغ-سالامات گل‌دی»، – دئدیلر.
قوجا ائشیدیب شاد اولدو. گومبور-گومبور تبیللر چالین‌دی. قؽزیل-تونج
بورولار گؤیه اوجالدیل‌دی. او گۆن بؤیوک، گئنیش اوتاقلار تیکیل‌دی. آتدان آیغیر،
دوه‌دن بوغرا، قویون‌دان قوچ کسدیریل‌دی.
قوجا بی اوغوللارینین قارشی‌سینا گل‌دی. آتین‌دان ائندی، اوغلانلاری ایله
قوجاقلاشیب گؤروش‌دو: «ساغ-سالامات‌سیزمی، یاخشی‌سیزمی، اوغوللار؟» – دئدی.
گۆنلویو قؽزیل تاغ‌لی ائولرینه گل‌دیلر. شادلیق، یئمک-ایچمک اولدو.
اوشون قوجا بؤیوک اوغلو اۆچون ده گؤزل گلین گتیردی. ایکی قارداش بیربیرینه
ساغدیش اولدو؛ آتلارینی چاپیب گلین اوتاقلارینا گئت‌دیلر. اؤز مورادلارینا
یئتیش‌دیلر.
دده‌م قورقود گلیب بوی بویلادی، سوی سویلادی:
اول-آخیر اوزون عؤمرون سونو اؤلوم‌دور!
اؤلوم گلدیک‌ده الله سیزی تمیز ایمان‌دان آییرماسین!
گۆناهینیزی محمدین اۆزو سویونا باغیشلاسین!
«آمین» دئینلرین اۆزونو گؤرسن،
خانیم، هئی!