بو داستانی بو گۆن بۆنیاد ائدهلیم،
یقین قۆدرتلرین بیز یاد ائدهلیم.
گلین، ائی معنی بحرینی سئیر ائدنلر،
بو دریا گؤهریندن خئیر ائدنلر.
معانیده قؽلی ایکی بیچنلر،
دیلیندن دایما گؤهر ساچانلار.
گلین، باری بو گۆن صؤحبت قؽلالیم،
معانی کانینین دۆرّون بولالیم.
اونون بیرلیگینی ذیکر ائیلهیه دیل،
خاطیردا قالمایا ذرّهجه مۆشکیل.
زیرا کیم دیللری سؤیلهدن اولدور،
اونون حیکمتلری قوللارا بولدور،
اونون حیکمتلرینه عقل ایریشمز.
ایشینه کیمسهنه هرگیز قاریشماز.
اونون کئیفیتی بولونمادی هئچ،
مکانی قاندادیر بیلینمهدی هئچ.
نه ظاهیردیر او کیم گؤزدن ایرالماز،
نه باطیندیر او کیم هرگیز گؤرولمز.
اونون اوّلینین اؤنو بولونماز،
اونون آخیرینین سونو بولونماز.
نه دیلیم وار اونو شرح ائیلهیم من،
نه بیلیم وار کی، شرحینی سؤیلهیم من.
اونون دیل ذیکرینی ائتمک گرکدیر،
اونون دوغرو یولون گئتمک گرکدیر.
اۆزوم قارا، سؤزوم قؽسا، سوچوم بول،
بئلیم ایری، یولوم دوغرو، بویوم سول.
شاشی باخدیم، جۆدا دۆشدوم گر اوندان،
منیم حالیم نئجه اولوسر اوندان.
قووا-قووا کؤنول دریایا ایردی،
عؤمور کئچدی، ساققال و ساچ آغاردی.
عبث یئرلرده خرج ائتدیم یاشیم من،
یئریدیر داشلارا دؤیسم باشیم من.
همین واردیر اۆمیدیمیز صفادان،
مگر مدد ایریشه مصطفیدان.
اۆمیدیمیز ایکی عالمده اولدور،
اونون شفقتلری قوللارا بولدور.
سلام اولسون اونون یارانلارینا،
مۆدام رحمت ایریشسین جانلارینا.
ابوبکر، عمر، عثمان، علیدیر،
ائیی دیریلیکدیر بونلار ولیدیر.
بونلار توتمادیلار کیبر کینایت،
بونلار بیلدی نهدیر دین دینایت.
صفا خاطیرلر ایچینده کین اولماز،
کین اولدوغو کؤنوللرده دین اولماز.
سۆرهلیم کؤنلوموزدن کیبری، کینی،
یؽخارلار کیبر ائدنلر مۆلک-دینی.
گل ایمدی مصطفییا وئر صالاوات،
دئیهلیم نئجهدیر آنلا حکایات.
ائشیت گل بیر حرامینین سؤزونو،
اگر گؤرور ایسن معنی یۆزونو.
اولورسا حق-تعالیدان عینایت،
قؽلام بو قیصّهیی بیر-بیر حکایت.