آلتینجی مجلیس

دوتوب جان قولاغین بو سؤزو دینله،
نه‌یه وارور بو ایشین سونو آنلا.
گۆلندام اوسونو باشا گتیردی،
حقه سؽغیندی، گؤر نه ایش بیتیردی.
روان اول قؽرخ آیاقلی نردیباندان
ایتر حرامی‌یی یایاق آندان.
اوچوردو یئر یۆزونه اول حریفی،
ذی گنج آرسلان، دیلاور گؤر ظریفی.
چۆ سۆروچدی آیاغی اول نابکارین،
یۆرگینه سو سپیلدی نیگارین.
گهی باشی دؤنر، گاهی آیاغی،
او گئدیشده کیشی نئدر دایاغی.
یئره توخوندی اول دم ائندی چۆن باش،
داغیلدی اولدی بئنیی خورد-خاشخاش.
جانین ایسمارلادی جهنمه اول،
پارالاندی آیاغی، باشی، ال، قول.
نه کیم ائتمیشدی، ایمدی تانری وئردی،
گۆلندامی مورادینا ایریردی.
کیشی یاووز ایشه ائتسه بۆنیاد،
سون اوجو آندان آلیر حاقین اوستاد.
قاچان کیم دادینی آلدی گۆلندام،
گۆلفروخ شاها گلدی اول دیلارام.
ایریب تعجیل ایله ایچری گیردی،
هنوز دخی گۆلفروخ شاه اویوردی.
ایکن غفلتده اویغو توتموش ایدی،
بو حالی دویمادی نه ائتمیش ایدی.
ایکن خوش اولدو کیم دویمادی آنی،
گؤروب اول ظالیمی اۆرکمه‌دی جانی.
گۆلندام گلدی آیدیر: هئی دور اخی!
حرامی‌یه نه‌لر ائتدیم گؤر آخی.
گۆلفروخ شاه آیدیر: ائی نیگاریم،
دل اولدون اولامی، گؤزو خوماریم.
سنه ائرته بیتیلر یازدیراییم،
حکیمه دخی شربت دۆزدوره‌ییم.
خیالیندیر کی قورخارین همیشه،
بو سؤزه اینسان عاغلی نه ایریشه؟!
گۆلندام آیدیر: ایمدی دور، گؤره‌سن،
بنه آندان بیتیلر یازدیراسان.
چؽخار گؤرور نه قول وار، نه رعیّت
دؤنوب سوردو کی، هئی، نه‌دیر حکایت.
گۆلندام سؤیله‌دی کیم، اول بد اختر،
یۆزو قارا حرامی‌یه – قارا ار.
نه کیم بکچی قولون وار ایدی، قؽرمیش،
گلوب تا کیم سری قاتیما گیرمیش.
اویور ایکن سنی دؤشکده قویدوم،
سنی سؽغیندیغیمدان آنا اویدوم.
بنی آلیب گئدرکن ناگهانی،
باشیندان نردیبانون ایتدیم آنی.
هامان اول دم یؽخیلدی، ائندی آندان
کۆپوردی‌سین ائشیتدوم بیر زاماندان.
مۆدارا اهلیدیر، سِحری دلیمدیر،
او کی مکّار کیشیدیر، حق عالیمدیر.
دیریمی، اؤلومی بیلمزم آنی
نه‌دیر بیلمک گرک اول قلتبانی.
گۆلفروخ خلقینه اول دم چؽغیردی،
یاراقلانین گلین، – دئیو قؽغیردی.
یاراقلاندی ائشیدن آندا گلدی،
قاپیدا ج‍ۆمله‌جیگی حاضیر اولدی.
یاخیبان شمعدانلار، گؤردو آنلار،
اول آرسلانلار کئییک یئر گؤردو آنلار.
تعجّوب ائیله‌ییب ج‍ۆمله دورورلار
او قوللارین حالین آندا گؤرورلر.
قویون کیبی قؽریلمیش یاتیر آنلار،
روان آخار ایدی سئل کیبی قانلار.
حرامی اولموش ایدی خورد-خاشخاش،
نه قول قالمیش، نه بود قالمیش، نه خود باش.
دیزیلدی خالق حرامی‌نین قاتینه،
تانا قالدیلار آنین قامتینه.
گۆلفروخ آنی گؤردی، اولدی هم شاد،
چۆ دۆشمن اؤلدی غمدن اولدی آزاد.
بویوردی تئز نقاره‌لر اوریلدی،
خبر اولدی اۆچ شهرین خلقی گلدی.
سئوینیب ج‍ۆمله‌سی شادان اولورلار
یۆز اوروبان حقین شۆکرین قؽلیرلار.
او گئجه صۆبحه‌دک عیشرت ائدرلر،
صاباح اولوجاغیز گؤر کی، نئدرلر.
باشین احمد حرامی‌نین کسرلر،
دخی گؤوده‌سینی بۆرجه آسارلار.
آلیب بگلر باشین مئیدانه چؽخدی
نیشان ایچون قاباق یئرینه دیکدی.
تاماشایی گؤرور اول گۆن امیرلر
اولو، کیچی، سیپاهیلر، وزیرلر.
اوخا دیکدیلر اول دۆشمن باشینی،
سون اوجو نولدو گؤر آنین ایشینی.
یاووز سانیلاری باشینا گلدی،
نه کیم سانیردی خلقه، کندی بولدو.