سنده یوخ ایمان کی، سن آلدین دئییم ایمانیمی

هر گؤرن عیب ائتدی آب دیدۀ گریانیمی،
ائیله‌دیم تحقیق، گؤرموش کیمسه یوخ جانانیمی.
لحظه لحظه خوبلار گؤردوم کی، دل قصدینده دیر،
پاره پاره ائیله‌دیم من هم دلسوزانیمی.
چوخ یئتیرمه گؤگ لره افغانیم، ای کافر، ساقین،
اینجینیر ناگه مسیحا ائشیدیب افغانیمی.
قیلما هر ساعت منی رسوای خلق، ای برق آه،
ائیله‌مه روشن شب غم کلبۀ احزانیمی.
چیخما، ای دیوانه، بازار ملامتدن دئیر،
متصل چاک گریبانیم توتار دامانیمی.
خانسی بت دور بیلمزم، ایمانیمی غارت قیلان،
سنده یوخ ایمان کی، سن آلدین دئییم ایمانیمی.
ای فضولی، جانه یئتمیشدیم کؤنول دن، شکر کیم،
باغلادیم بیر دلبره، قورتاردیم اوندان جانیمی.