غمزه سین سئودین، کؤنول، جانین گرکمزمی سانا؟
تیغه اوردون، جسم عریانین گرکمزمی سانا؟
آتشین آهیمله ائیلرسن منه تکلیف باغ،
باغبان، گلبرگ خندانین گرکمزمی سانا؟
یئله وئرمه داغیدیب هر یان، آیاقلاردان گؤتور،
ای پری، زلف پریشانین، گرکمزمی سانا؟
ای کمان ابرو، رقیبه وئرمه غمزهندن نصیب،
اوخ آتارسان داشه، پیکانین گرکمزمی سانا؟
یاندیریب جانیم، جاهان سوز ائتمه برق آهیمی،
آسمان، خورشید رخشانین گرکمزمی سانا؟
کفر زلفوندن منی منع ائیلهمک لایقمیدیر،
صوفی، انصاف ائیله ایمانین گرکمزمی سانا؟
توتالیم کیم، اشک سیلابینه یوخدور اعتبار،
ای فضولی، چشم گریانین گرکمزمی سانا؟