قد انارالعشق للعشاقی منهاج الهودی!

قد انارالعشق للعشاقی منهاج الهودی!*
سالک راه حقیقت عشقه ائیلر اقتدا.
عشق دیر اول نشاء کامل کیم، اوندان دیر مدام
مئیده تشویر حرارت، نئیده تأثیر صدا.
وادی وحدت، حقیقتده، مقام عشق دیر
کیم، مشخص اولماز اول وادیده سلطاندان گدا.
ائیله مز خلوتسرای سرّ وحدت محرمی
عاشقی معشوق دن، معشوقی عاشقدن جدا.
ای کی، اهل عشقه سؤیلرسن: ملامت ترکین ائت!
سؤیله کیم، ممکن مودور تغییر تقدیر خدا؟
عشق کلکی چکدی خط حرف وجود عاشقه
کیم، اولا ثابت حق اثباتیندا نفی ماعدا.
ای فضولی، انتها سیز ذوق بولدون عشقدن،
بؤیله دیر هر عیش کی، حق عادله قیلسان ابتدا.
—————————————————-
* عشق عاشق لر ایچون هدایت یولونو ایشیقلاندیردی.