عهد قیلدین کی

ای فراق لب جانان، جگریم خون ائتدین،
چهرۀ زردیمی خوناب ایله گلگون ائتدین.
جگریم قانینی گؤز یاشنا تؤکدون، ای دل،
واره واره اونی قلزم، بونو جیحون ائتدین.
نئجه حسن ایله سنی لیلیه نسبت قیلاییم،
بیلمه‌ییب قدریمی ترک من مجنون ائتدین.
سؤیلدین کیم، توتارام شاد کؤنول لرده مقام،
شاد ایکن، بو سؤز ایله کؤنلومی محزون ائتدین.
عهد قیلدین کی، جفا کسمه یه سن عاشق دن،
عاشقی وعدۀ احسان ایله ممنون ائتدین.
جرعه جرعه مئی ایچیب، زیب جمال آرتیردین،
ذره ذره گؤزومون نورینی افزون ائتدین.
ای فضولی، آخیدیب سیل سرشک آغلی یالی،
عشق اهلینه فغان ائتمگی قانون ائتدین.