وئرمه ین جان، اعتراف ائتمک گرک نقصانینه

عاشق اولدیر کیم، قیلیر جانین فدا جانانینه،
میل جانان ائتمه سین هر کیم کی، قییماز جانینه.
وصل ایامی وئریب جانانه جان، راحت بولان،
یکدیر اوندان کیم، سالیر جانین غم هجرانینه.
خالی اول عشق ایچره کیم، بنزر فنای عاشقین
فیض جاوید ایله خضرین چشمۀ حیوانینه!
جانمی جانانه وئرمک دیر کمالی عاشقین،
وئرمه ین جان، اعتراف ائتمک گرک نقصانینه.
عشق رسمین عاشق اؤیرنمک گرک پروانه دن
کیم، گؤیر گؤردوکده شمعین آتش سوزانینه.
عشق دردی نین دواسی قابل درمان دئگیل،
ترک جان دئرلر بو دردین معتبر درمانینه.
هیچ کیم جانان ایچون جان وئرمگه لاف ائتمه سین
کیم، گلیب دیر بو صفت آنجاق فضولی شانینه.