کمال سحرینه چوخ قیلدی افتخار قلم

مگر قیلیر رقم وصف خط یار قلم
کی، خط یار کیمی اولدی مشکبار قلم.
مگر دیلر صفت لعل یار ائده تحریر
کی، لعل یار کیمیدیر گوهرنثار قلم.
اگر جفا چکه صورت نگاردن یوز ایل،
دئمن چکه صفت صورت نگار قلم.
یازاندا میم و الف اول قد و دهانه شبیه،
کمال سحرینه چوخ قیلدی افتخار قلم.
ولی خرام و تکلم وئریرده عاجز اولوب،
خطینه چکدی خط و اولدی شرمسار قلم.
نه یئرده کیم یوگورر نافه – نافه مشک تؤکر،
توتوبدورور روش آهوی تاتار قلم.
خجسته خضردیر آب حیات ایچمک ایچون،
زمان – زمان ظلماته قیلیر گذار قلم.
نه ایچدی محبره دن بیلمزم کی، واله اولوب
اؤزونه ائیله‌دی سرگشته لیک شیار قلم.
قارا باشین گؤتوروب دایم ائلدن ائله گزر،
توتارلار ایسه، داخی ائیله مز قرار قلم.
بیر اؤز باشنا اولالمیش، قراری یوخ، ده لی دیر،
چیخینجا دوتماسالار، عالمی ییخار قلم.
سیاه بختلوگی یازمش آلنینا تقدیر،
نولا کئچیرسه قارا گونده روزگار قلم.
دیلیله متصل اؤز باشنا بلا گتیرر
کی، خلقه گیزلی سؤزو ائیلر آشکار قلم.
تجارت اهلینه بنزر، مسافرت یولونا
خطوط سطرلریندن چکر قطار قلم.
قارادورور اوزو اول وجه دن کیم، ائیلر فاش
اؤزویله یاری آراسیندا هر نه وار، قلم.
شکسته نامه‌لری یعنی اهل حسنه ساتار
متاع مملکت هند و زنگبار قلم.
اؤپر صفحه یوزون وه گؤرون بو طالع کیم،
بولور وصال نگار سمن عذار قلم.
مداد طره سینه اوز سورر، زهی دولت،
دوتار همیشه سر زلف تایدار قلم.
اونونچون الدن اله گزدیریر اکابر کیم،
تاپوبدور آصف دوراندان اعتبار قلم.
گل حدیقۀ اقبال مصطفی چلبی
کیم، اولدی دولت قربویله کامکار قلم.
سمی احمد مرسل کی، قیلدی اونا طفیل
دمی کی، لوح ایله یاراتدی کردگار قلم.
نسیم خلقونون اوصافین ائتمگه تحریر،
چمن الینه وئریر سبزه هر بهار قلم.
ایا بلند جنابی کی، مدحتینده اولور
همیشه معترف عجز و انکسار قلم.
ریاض قدرده فضلین نهال رأفت دیر،
نهال فضلینه بیر طرفه شاخسار قلم.
نهال دولته قدرین ریاض حکمت دیر،
ریاض قدرینه بیر طرفه جویبار قلم.
الینه آلماز ایمیش مصطفی قلم، دئرلر،
بو ذلت ایله بسی اولموش ایدی خار قلم.
سنه یئتیردی اؤزون نسبت ایله تاپماق ایچون
زمانه ده سنین آدینلا اعتبار قلم.
کلیم طور وفاسن کی، اهل خیر و شره
الینده گاه عصا اولدی، گاه مار قلم.
بوراخدی جانینی داروالشفای درگهینه
هجوم حادثه دن خسته و نزار قلم.
الیندن ایچدیگی شهد شفای حکمتدن
مزاج نازیکینه اولدی سازگار قلم.
بسی عزیزلرین خدمتینه باغلادی بئل،
قامینی ترک و سنی قیلدی اختیار قلم.
ثبات عهدینی ایامدن قیلیب معلوم،
سنینله ائیله‌دی عهدینی استوار قلم.
آراییب اهل هنر وارینی یئتینجه سنه،
جاهان ایچینده بسی چکدی انتظار قلم.
وئریب نظام جاهان آصف و نظام الملک
گئدیب، جاهاندا سنه قالدی یادگار قلم.
سنین مطیعین اگر اولماسایدی، اولماز ایدی
سواد اعظم خط ایچره شهریار قلم.
آلینمیش آغچا ایله بیر قولون دورور مقبل،
باشین اگر کسه‌لر ائیله مز فرار قلم.
سؤزون یئریتمگه باشدان آیاق ائدیب یوگورر،
کمال شفقتینه دیر امیدوار قلم.
سپهر منزلتا، اول فضولی زارم
کی، حال زاریمی یازینجا اولدی زار قلم.
ثنای ذاتینه چوخدور سؤزوم، ولی نه دئییم
کی، سُستلوک قیلیبان وئردی اختصار قلم.
دئدی: ساقین، سؤزو چوخ ائتمه، ساخلا شرط ادب
کی، چوخ سؤزوندن اولوبدور سیاهکار قلم.
امید وار کی، نظم نظام عالم ایچون
فلکده تا اولا لوح ایله پایدار قلم،
سن اولاسان قلمه اعتبار ایچون حامی،
سنه حکومت ایچون اولا دستیار قلم.