فیض تعلیم ایله بوستانی دبستان ائیلر

باغ لوحینه خزان برگی زر افشان ائیلر،
آب اول لوحده مشک خط ریحان ائیلر.
ای کؤنول، گلدی باهار، ائیله چمن سیرانین،
گؤر کی، حالا نه عمل عامل دوران ائیلر.
یئنه پیر فلک، اطفال ریاحینی ییغیب،
فیض تعلیم ایله بوستانی دبستان ائیلر.
سو آیاغینی کسیب بیهوده گزمک لردن،
سبزه یی هم سبق درس گلستان ائیلر.
غنچه یی متن مطالعده ائدیب عقده گشای،
لاله نی شرح طوالعده سبق خوان ائیلر.
سنبلی علم الهیده قیلیب موی شکاف،
سوسنی بحث ریاضیده سخندان ائیلر.
درس منطق اوخور ایکن دل ایلن مرغ سحر
توتولوب، اوخودوغو گل لری خندان ائیلر.
بلبلی هر نئچه کیم حافظ خوش لهجۀ آب
اؤگردیب حسن ادا، قاری قرآن ائیلر،
گؤر نزاکت کی، گلیب صبح صحف خوانی اونا
عیب تقریر قیلیب طعنۀ الحان ائیلر،
فصل کیفیت قانون طب ائتمیش حاصل،
بحث تشخیص مرض، دعوی درمان ائیلر.
شربت باده ایلن چوخ سینادیم، خسته لره
ائیلر اونی کی، نه بقراط و نه لقمان ائیلر.
بیلمزم سحرمی، معجزمو نسیمین ایشی کیم،
حرکاتی خرد خیره و حیران ائیلر.
هر مزاجه کی، دیلر اؤیله قیلیر مدخل کیم،
اونو ادراک نه ارواح و نه ابدان ائیلر.
حبذا دهر کی، پیوسته سحاب فیضین
باعث تربیت باغ و بیابان ائیلر.
غنچه نین گؤرسه آچار رشتۀ طبعینده گره،
بلبلون بیلسه ایشین، مشکلون آسان ائیلر.
انتظارایله داشی لعل قیلوب رنگ وئرور،
روزگارایله سویو، لؤلؤ غلطان ائیلر.
قطره یی مدت ایلن متصل بحر قیلیر،
ذره یی واصل خورشید درخشان ائیلر.
لیک غایتده تعجب قیلیرام کی، نه ایچون
من محرومی همین خستۀ حرمان ائیلر.
غیره احسانی چوخ و لطفی یوکوش، لیک منه
سیتمی وافر و بیدادی فراوان ائیلر.
کاش باغریمی قضا سو ائده گؤز یاشی ایچون
چشمه تک، دورمایوبان چون منی گریان ائیلر.
کاش جسمیمی فلک داش ائده، بیداده دؤزم،
معدن لعل کیمی چون جگریم قان ائیلر.
یئر یوزوندون گؤتورولمکده گمانیم داخی یوخ،
بئله کیم، تن چورویوب، گؤز یاشی طغیان ائیلر.
بی خبرلر بیلمز اشک روانیم اثرین،
گرچی تنبیهینه دل ناله و افغان ائیلر.
اهل طغیانه اثر ائیله یه مز گریۀ نوح،
گرچی هردم اولاری واقف طوفان ائیلر.
ای فلک، بو نه روا دیر کی، سپاه ستمین
دیل معموریمی یغما ایله ویران ائیلر.
بیر دئمزسنمی کی، ناگه ستمیندن بو فقیر
قاضی عسکره شرح غم پنهان ائیلر.
اول قضاحکم کی، چرخ ائتسه خلاف ره شرع
قیلدیغیندان اونی زجرایله پشیمان ائیلر.
اول قدر نامه کی، مور ختی نین مضمونی
نیه کیم ظاهر اولور، حکم سلیمان ائیلر.
عرش تمکین و فلک مرتبه قادر چلبی
کی، فلک تابعی دیر هر نه یه فرمان ائیلر.
چرخ بیر تیغ چکیب دیر یئنی آیدان کی، مدام
کیمی گؤردویسه مخالف، اونا قربان ائیلر.
مین ایلین برهمه نین موعظۀ معرفتی
قابل دین قیلیر، مایل ایمان ائیلر.
عرض ایمان بته گر قیلسا دم جانبخشی،
جان وئریب معجز ایلن آنی مسلمان ائیلر.
لفظ جان پرور ایلن رشهۀ کلک هنرین
نه دم عیسی و نه چشمۀ حیوان ائیلر.
ای ورع پیشه کی، دایم قدم ثابتینی
رسم اسلامه قضا قایم ارکان ائیلر.
رایض تندرو طبع لطیفین دون و گون
توسن فکرت ایلن چرخده جولان ائیلر.
میل ائدر خدمتینه دولت توفیق تاپیب
کیم کی، حقدن طلب رتبۀ عرفان ائیلر.
سن مُقام ائتمه دیگین معبه ده عابدلردن
کیم کی، مأوای ملاییک دئسه، بهتان ائیلر.
سالماسا سبحه اؤزون دایرۀ مجلسینه،
رشتۀ عقدین اوزوب چرخ پریشان ائیلر.
سنه گر دورماسا بیر لحظه مقابل محراب،
باشینی داشه اوروب چاک گریبان ائیلر.
سندن آیریلسا، مصلایی آیاقلاره سالوب
ضعف طالع قارا توپراق ایله یکسان ائیلر.
هر سیه دل کی، قوماز باش خطینه خامه صفت،
قارا جاهل دیر اگر دعویگ عرفان ائیلر.
گرچی سلطانه دیر اسلام قیامی منسوب،
سنه منسوبدور اول سعی کی، سلطان ائیلر.
سرورا، بنده فضولینی کمان قد گردون
متصل درد و بلا اوخونا قالخان ائیلر.
ائشیدیب طعنۀ دم سردلری هر دم کیم،
شمع تک شرح غم کلبۀ احزان ائیلر،
اؤیله کیم، فهم ائدوبم حال دلین سنسن و بس
سن اگر قیلماز ایسن، اونا کیم احسان ائیلر؟