رموز نکتۀ توحید حق خاطرنشان ائیلر

بو بحر نیلگون مین موج هر ساعت عیان ائیلر،
اولوالابصاره بیر بیر کشف اسرار نهان ائیلر.
نشان کثرت اشیا دمادم اهل تقلیده
رموز نکتۀ توحید حق خاطرنشان ائیلر.
بیان ماجرای ماسلف حال اهلینه بیر – بیر
زبان حال یلن کیفیت قدرت بیان ائیلر.
تنعّمده غرور و فقرده حرمان شعار ائتمه
کی، حکمت بو ایکی حالتده خلقی امتحان ائیلر.
وئرور فقر ایچره شکر اهلینه قدر موسی عمران،
تنعّم ایچره ترک اهلین، سلیمان زمان ائیلر.
خوشا اول کیم، بیلیب فقری تنعّم، ملک دنیانین
یوخون ائیلر تصور وار، وارین یوخ گمان ائیلر.
زیان و سودینی دهرین، فنا فهم ائیله ین عارف،
حیاتین سود سوداسیله صرف ائتسه، زیان ائیلر.
یامانلیق، یاخشیلیق کیفیتین معلوم ائدن عاقل،
یامانلیق ائدنه یاخشیلیق ائتمزسه، یامان ائیلر.
فلک گویا دئگیل اهل فراست کیم، وفا اهلی
جفاسیندان اونون پیوسته فریاد و فغان ائیلر.
من اوندان ایسترم تعظیم و تکریم و توانالیق،
منی گون – گوندن اول زار و ضعیف و ناتوان ائیلر.
تنیمده ضعف دن بیر استخوان قالمیشدورور، گردون
مدام اول استخوانی غم خدنگینه نشان ائیلر.
نچون کیم خاکدان عالم سفلاده عادت دیر،
کماندار اوخ آتان ساعت، نشانین استخوان ائیلر.
ایریشمز کیمسه دن احوالیمه فیض نظر، بس کیم
منی ضعف بدن دایم نظرلردن نهان ائیلر.
کؤنول ویرانه سین معمور قیلماق قصدینه چشمیم،
عذاریم اوستونه جدول چکیب سولار روان ائیلر.
بعینه اؤیله کیم، جدول چکیب سولار قیلیب جاری،
امیر کامران ویرانه یئرلر آبدان ائیلر.
سرافراز زمانه، میر ویس معدلت پیشه
کی، عدلی هر زامان روح رسولی شادمان ائیلر.
زهی صالح کی، دایم اقتدای امر معروفون
اطاعت اهلینی آسیب دوزخ دن رهان ائیلر.
اونا قیلسین اطاعت بویروق ایلن ائیله سین طاعت،
قیامت وقتی هر کیم میل گلزار جنان ائیلر.
وئریر قرآن یئرینه صحت طاعت اگر زاهد،
نماز ایچره دعای دولتین ورد زبان ائیلر.
اگر تعلیم وئرسه صورت دیواره اهل دل،
قیلیب کامل قامی معنی دن اونی نکته دان ائیلر.
ایا پاکیزه اخلاق و فلک قدر و ملک سیرت
کی، هر ناکامه یئتسه التفاتین کامران ائیلر.
بهار ایامینه گر فیض اخلاقین اثر سالسا،
هواسینی قیلیر جان بخش و ابرین دُرّ افشان ائیلر.
خزان فصلینی گر طبع لطیفین تربیت قیلسا،
تؤکر آلتون ورق لر، آدینی برگ خزان ائیلر.
کمال همتین چون ملک تعمیرینه ساعی دیر،
قامی صحرالری، البته، باغ و بوستان ائیلر.
بو گوندن سونرا قالماز هیچ ویران ملک، حیرانم
کی، جغد آباد یئردن قاچسا قاندا آشیان ائیلر؟
بو گوندن سونرا صحرالار اولور مردم نشین، یا رب،
اگر وحشی گلیب رام اولماسا، قاندا مکان ائیلر؟
وئریر تعمیر ملک بایره باران احسانین،
نچوک کیم، آب خضر امواتی حی و جاودان ائیلر.
سنه طاعت یئتر آنجاق بو کیم، دایم حوادث دن
خلایق حفظینی محروسۀ امن و امان ائیلر.
خداوندا، سنه منسوب دور احکام شرعیه،
نچوک گردون منه دورونده جور بیکران ائیلر.
نه حیف ائتدیم اونا کیم، دؤنه دؤنه حیف آلیر مندن،
نه سین اؤلدورموشم کیم، لحظه لحظه قصد جان ائیلر؟
گناه سیز باغریمی قان ائیله‌دی جایزمی دیر بؤیله؟
رضای حق ایچون بیر سور کی، ناحق نیشه قان ائیلر.
فضولی دن گؤتورمه سایۀ الطع و احسانین،
کمال عدلینی ذکرایله مشهور جهان ائیلر.
امیدیم وار کیم، تا آسمان دیر دؤور ایلن دایر،
سنین رأیینجه اولسون دورلر کیم، آسمان ائیلر.