بلا دیر کیم، دل عاشق کیمی ویران اولا کشور

نه موجود اولماسا اسباب دنیادن، دئگیل مشکل،
بو مشکل دیر کی، موجود اولمایا بیر حاکم عادل.
نه درد دل کی، اوز گؤسترسه دوراندان دئگیل محنت،
بودور محنت کی، شرحین قیلماغا اولمایا اهل دل.
مریضین اولسا مین دردی، بو درد اونلاردان افسون دور
کی، تشخیصینه اولمایا طبیب حاذق و کامل.
بلا دیر کیم، دل عاشق کیمی ویران اولا کشور،
اولا اول حال دن حاکم اولان محبوب وش غافل.
هوای نفسه تابع اولا اهل ملک دن فارغ،
قیلیب عشاقی نین ترکین، رقیبینه اولا مایل.
بینای خانۀ رحمت مرور ایلن اولوب ویران،
طلسم نظم جمیعت اولا تدریج ایله باطل.
نه خوش دور اهل عالم رغبتی چون اولا حاکمده
رخ رخشان، لب خندان، دل دانا، کف باذل.
مداوای قلوب منقبض بیر درددیر مهلک،
مکافات ملوک تندخو بیر زهردیر قاتل.
نه امید ایله صورت باغلاسین اظهاره شرح غم،
جواب تلخ دن یئیرک بیلیر حرمانینی سایل.
نشان حسن طالع بو یئتر بغداده کیم، هرگز
اونا راحت ملاقاتیندا یوخ بیر مانع و حایل.
بحمدالله سلاح دولت ایچون مسند رفعت،
بو گون بیر قطب صاحبدل و صائب رأیه دیر منزل.
سپهر دولت و اقبال، ملک آرای جعفر بگ
کی، یکسان دیر اونون عدلینه حکم عالی و سافل.
زهی عادل کی، دورانیندا دهقان تیره توپراغه
بوراخسا دانۀ جو، خوشۀ پروین قیلیر حاصل.
فلک تأثیر اقبالیندان ایستر قوت طالع
کیم، اولموش بحر محصولینه، کان ادرارینا عامل.
امور خیر و احسان بولدو ایامیندا مین رونق،
عدالت ملتزم دیر اول اموره، مرحمت کافل.
حساب مجمل اوصافی دیر بیر پاک دفتر کیم،
جاهانین خیر محصولو اونون جمیعنه دیر داخل.
زمانیندا زمان اهلینه هرگز چکمه‌میش کاتب،
حساب اولدیقدا غیر عز و رفعت باقی و فاضل.
سرافرازا، نوال نعمت و ادرار احسانین،
جمیع ملکه دیر جاری، جمیع خلقه دیر شامل.
توجه قیل، ملالت چکمه، اکراه ائتمه کیم، حقدن
بیر آیت دیر نظام ملک و ملت شأنینه نازل.
اگر حکم ائتسه حسن طالعین، باران اولوب لؤلؤ،
سنه منت سیز ائیلر ابر و دریا حاصلین واصل.
سنه نسبت بو رتبه رتبۀ مذموم دور، امّا
نه چاره، زینت ایامه سنسن جوهر قابل.
عدالت سنده بولموش دور، سنه محتاج دیر کشور،
گوهر امیدی بیرله دامن دریا دوتار ساحل.
شها، گر اولماسایدی لطف و ادراکین تقاضاسی،
فضولی نین قالیردی کارگاه صنعتی باطل.
ثنای عز و اقبالین دیلر البته بیر مادح،
ظهور لطف و احسانین دیلر البته بیر سایل.
امیدیم وار کیم، تا نور و ظلمت اولا عالمده،
جاهاندان سایۀ جاه و جلالین اولمایا زایل.