منو
البته چوخ حکایت اولور موجب ملال
٠۲ ماه محرم اولدی شفقدن چیخیب هلال،
قیلمیش عزا، تؤکوب یوزه خون بیرله اشک آل.
اولاد مصطفایه مدد قیلمامیش فرات،
کئچیرمه سینمی یئرلره آنی بو انفعال؟
چوخدور حکایت آلم شاه کربلا،
البته چوخ حکایت اولور موجب ملال.
عبرتله باخ، غم شهدا شرحین ائتمه یه
هر سبزه کربلاده آچیبدیر زبان حال.
تجدید ماتم شهدا قیلدی روزگار،
زار آغلا، ای کؤنول، بوگون اولدیقجا احتمال.
میدان چرخی جلوه گه دود آه قیل،
گردون دونه گونۀ ماتم سیاه قیل.
ماه محرم اولدی، مسرت حرام دیر،
ماتم بوگون شریعته بیر احترام دیر.
تجدید ماتم شهدا نفع سیز دئگیل،
غفلت سرای دهرده تنبیه عامدیر.
غوغای کربلا خبرین سهل سانما کیم،
نقص وفای دهره دلیل تمام دیر.
هر ذره اشک کیم، تؤکولور ذکر آل (ع) ایله،
سیارۀ سپهر علو مقام دیر.
هر مدّ آه کیم، چکیلیر اهل بیت ایچون،
مفتاح روزۀ در دار السلام دیر.
شاد اولماسین بو واقعه دن شاد اولان کؤنول،
بیر دم بلاو غصه دن آزاد اولان کؤنول.
تدبیر قتل آل عبا قیلدین، ای فلک،
فکر غلط، خیال خطا قیلدین، ای فلک.
برق سحاب حادثه دن تیغلر چکیب،
بیر بیر حوالۀ شهدا قیلدین، ای فلک.
عصمت حرمسراسینه حؤرمت روا ایکن،
پامال خصم بی سرو پا قیلدین، ای فلک.
صحرای کربلاده اولان تشنه لب لره
ریگ روانی سیل بلا قیلدین، ای فلک.
تخفیف قدر شرعدن اندیشه قیلمادین،
اولاد مصطفایه جفا قیلدین، ای فلک.
بیر رحم قیلمادین جگری قان اولانلارا،
غربتده روزگاری پریشان اولانلارا.
باسدیقدا کربلایه قدم شاه کربلا،
اولدی نشان تیر ستم شاه کربلا.
دود دل پر آتشی اهل نظاره دن
ائتمیشدی پرده دار حرم شاه کربلا.
اولدوقجا عمرو راحت دل گؤرمه‌ییب دمی،
اولموش همیشه همدم غم شاه کربلا.
اعدا مقابلینده چکنده صف سپاه،
قیلمیشدی مدّ آهی علم شاه کربلا.
یا شاه کربلا، نه روا مونجه غم سنه،
درد دمادم و الم دم به دم سنه.
ای دردپرور الم کربلا حسین،
وی کربلا بلالرینه مبتلا حسین.
غم پاره پاره باغرینی یاندیردی داغ ایله،
ای لالۀ حدیقه ی آل عبا حسین.
تیغ جفا ایله بدنین اولدی چاک چاک،
ای بوستان سبزۀ تیغ جفا حسین.
یاخدی وجودونو غم ظلمت سرای دهر،
ای شمع بزم بارگه کبریا حسین.
دور فلک ایچیردی سنه کاسه کاسه قان،
ای تشنۀ حرارت برق بلا حسین.
یاد ائت، فضولی، آل عبا حالین، ائیله آه
کیم، برق آه ایله یاخیلیر خرمن گناه.