باسقین

چن باسیب داغلاری، سریندیر هاوالار،
پاییز زامانیدیر کؤچوب اوبالار.
دؤرانی گلیبدیر قارا بولودون،
سؤنوبدور اوجاغی مۆقدّس یوردون.
داخمالار ساکیتدیر، قاپیلار باغلی،
قورولوب چادیرلار قارالی، آغلی.
سولطانین اوردوسو قؽزیشسین دئیه،
مئشه‌لر اودلاییب، تۆستولر پیه.
قولدورلار دئمک کی، فۆرصت تاپمیشلار،
بیر نئچه قؽز، گلین گئجه قاپمیشلار.
تاخیللار آلینیب، ائولر تالانیب،
کۆچه‌لرده چوخلو جمدک قالانیب.

آروادلار یۆیورور، آغلاشیر قؽزلار،
اۆفوقلر قارالیر، یاغیر آغیر قار.
قاپیلار باغلانیر، کسیلیر هر سس،
کند چکیر قار ایچره، آغیر بیر نفس.
ظفرینن اوردو آلدی بو کندی،
یؽخدی قالالاری، دۆشمانی یئندی.

ساکیت هاوا، لاکین بسلر فؽرتینا،
ائللری ایستیبداد گتیرر جانا.
نه باسقین، نه آتش، نه اؤلوم، نه قان،
نه پولاد زنجیرلر، نه قارا زیندان،
نه سۆنگو، نه خنجر، نه دار آغاجی
قانلی عۆصیانلارین دئگیل علاجی.
تاپدالانان اینسان دۆنیایی یؽخار،
ظۆلمون خیرمنینی آتشه یاخار.
او بیر جوشقون سئلدیر، اؤنو آلینماز،
او قؽزغین آسلاندیر، اسیر آلینماز.