سون گئجه

آی ایشیغی اؤپور سولاری... سولار،
سویوق بیر گۆلوشله اوزاقلاشیرلار.
گئجه‌نین سۆکوتون یؽرتان نغمه‌لر،
داغلاری آغلادان، داشقین دره‌لر،
چاغیریر فنایا اوغرایانلاری...
هۆرکودور قوشلاری، چالایانلاری...
اؤز سئوگیلی‌سیندن آیری دۆشن بیر
بایقوش آغاجلیقلاردا فریاد ائدیر...
چینارلاردان قوپان قورو بوداقلار،
قوملاردا چاغلایان، دورو بولاقلار،
تیتره‌دیر ظۆلمتین دالغالارینی،
آچیر حیاتین بۆتون اسرارینی...

سۆکوتا آلیشقان، محزون کؤنلوم،
سرمست، دینلرکن سرت باخیشلی اؤلوم،
قارا دومانلارا بۆرونن قول تک،
اوزادییر منه بیر زهرلی چیچک!..

ایچیردیر شۆکران ایله دولو جام،
نئجه کی، ایچمیشدی زاواللی آنام...
گئجه یاری‌سیدیر، چؽراغیم سؤنور،
باشیم آغری‌ییر، اۆرگیم دؤیونور.

گؤی و یئر باشیما دؤنور... دؤنور من،
هله کایناتین سسین دینلرکن:
باخیرام اوزاقدان گلن بیر قؽزا،
اۆفوقلره ساری آخان یؽلدیزا...