سن هر گئجه، او غملی مئشهلرین آردیندان،
حکیمانه باخیشلا، دۆنیالارا باخیرسان...
لاجیورد گؤیلرده، بیر پری تک اوچارکن،
نهدن سویا دۆشوب ده دالغالارلا آخارسان؟
نهدیر سنین سیماندا، او کؤلگهلی دۆشونجه؟
حیاتیندا چکدیگین، مؤحنتلرین ایزیمی؟
نه تیکمیشسن گؤزلرین اوزاق-اوزاق یوللارا،
گؤرونورمو اوزاقدا، آخیب گئدن بیر گمی؟
نه بیلیرسن ائی قمر، سن یانارکن ظۆلمتده،
هانسی گمی بو یاشیل ساحیللره یاناشدی.
سن چؽخارکن پردهدن، یئلکن آچیب قهرله،
سئوگیلیمین گمیسی دنیزلردن ده آشدی،
یوللار اوزاق، کاروان کئچیب یولدان بیخبر،
من پیادا دۆشموشم، یوللار اۆسته سایه تک...
آچ زۆلفون، آت کمندین، بیر گئجهلیک ائی قمر!
ائی «مرسدابه» منی ده او گۆموشلو بۆرجه چک!..