حیاتدیر آخار چشمه

حیاتدیر آخار چشمه،
یئتر آه، داستان دئمه!
کئچن گۆن، کئچن گئجه
بیر داها دؤنمز گئری.

یوخولارکن کؤهنه شهر،
پارلارکن گؤیده اۆلکر،
اوخورکن سوسریلر،
آن منی، گؤزل پری!

سحرین رۆزگاریندا.
دییرمان سولاریندا،
تبریزین باهاریندا،
رنگیم وار، سؤزوم واردیر.

مخمری چیچگینده،
ائللرین اۆرگینده،
فرشلرین ایلمگینده
ناخیشیم، ایزیم واردیر.

مهتابین چؽراغینا،
سرخابین آل داغینا،
اول ککلیک بولاغینا،
چوخداندی حسرتم من.

ائللره آلقیش اولسون،
دۆشمنه قارغیش اولسون
قار یاغسین، یاغیش اولسون،
گۆللنسین بیزیم وطن!

یوللاردیر چالا-چولا،
ساغدان دؤن چاپاق سولا.
او گئدر-گلمز یولا،
دیکمه گؤز، یئتر گؤزل!

داغلارین باشیندا قار،
سفرده حادثیه وار،
یول چتین، کئچیدلر دار،
هله آت کئچر، گؤزل!..