آذربایجانین گنج یازیچیسی
ناموراد فریدون ایبراهیمییه
ایل دؤنومون توتان یوخدو،
یوخدور سنی یادا سالان.
قبرین اۆسته گؤی اوت بیتدی،
ای ناموراد، یازیق جاوان.
آسیلدیغین گۆندن بری،
ماتملیدیر گؤی «گۆلوستان!»
دولاشارکن شیمال یئلی،
یوردون قؽزیل بایراغیندا،
ائللر ایله اود یاندیردین،
بابکیلر اوجاغیندا.
لاکین افسوس، سون ایشیق تک،
سؤندون حیات چؽراغیندا.
نه ائللرین مکتبینده
کیتابینی آچان اولدو،
نه یازدیغین قؽزیل یازی
رواج تاپیب داستان اولدو.
لاکین سانما بو عصرده
هر شئی بیتیب نیسیان اولدو.
گۆنون یئددی رنگی اریر
«قؽزیل اۆزن» سولاریندا.
سنین ایزین، کؤلگن قالمیش
آستارانین باهاریندا.
فاشیزم هله حؤکم سۆرور
قؽزیل اودلار دیاریندا.
مکتبلرده آنا دیلین
اوخوتدوران اوستاد یوخدور.
اوردو-اوردو اویماقلاردا
اسیر چوخدور، آزاد یوخدور.
کئچیب چؽراق، سؤنوب اوجاق،
خارابا چوخ، آباد یوخدو...
قارانلیقدیر، تیکانلیقدیر
حرامیلر پوسقو قوروب.
«باغمئشه»نین باغلارینی
توز باسیبدیر، آفت ووروب.
آزادلیغین گمیسینده
کافتار دوروب، شئیطان دوروب.
دالغالانیر فضامیزدا
زیندانلارین اینیلتیسی.
ائشیدیلیر سحر-آخشام
رادیودان دۆشمن سسی.
بیر چوخ هرزه اوت گؤوریب،
قاناد گریب یول ایبلیسی...
گئتدیم بابا دیارینا
گؤردوم بایقوش فیکره دالیب.
قبرین اۆسته آخشامچاغی
پاییز گۆنو شفق سالیب.
سندن، یولداش، خاطیرهلر،
درین سؤزلر جاندا قالیب.
عزرائیله قؽلینج چکسم،
یئنه بیر گۆن اؤلهجگم.
چؽراق کیمی یا بیر آخشام،
یا بیر سحر سؤنهجگم.
بیلیرم کی، یئر آلتیندا
توز-تورپاغا دؤنهجگم.
بونلا بئله امینم کی،
نور ظۆلمتی بوغاجاقدیر.
ان نهایت، اۆفوقلردن
قؽزیل گۆنش دوغاجاقدیر.
داش نه قدر برک اولسا دا،
ایستی، سویوق اویاجاقدیر.