دان یئری اؤلکهسین آتشده یاخان
آ! یونانیستاندا دئییرلر قان-قان!
بیزیم اؤلکهمیزین سرحدّین آشیب
خؽرمانین یاندیریب، کۆلون ساویریب.
ایندی سئوینیرلر... حنا یاخیرلار
قارا بولود اولوب، شیمشک چاخیرلار.
دئدیلر: — سولطانا دیش قؽجیرتدینیز
آل بایراغینیزدا «پارلادی یؽلدیز!»
دئدیلر کی: — ائللر قوووب اربابی
قؽلینج چکدی ایشچی، یادلار اۆزونه.
باغلادی قاپیسین، قوردو قورغوسون
اینانمادی «خان»ین یالان سؤزونه...
دئمهدیلر: داوا یورغان اۆستهدیر،
کۆشکورتدولر ایتی اۆستوموزه آه!
یاتماغا پول دا وئریب، جلّادا خنجر
یادلارین ایتی ایله بیزی بوغدو...
یاخشی بیلیردیلر کؤهنه شئیطانلا
دؤیوشن کیمسهنین یاراسی قانار.
آذر ائلی آزاد اولسا بو گۆن
الدن گئدر یارین خوراسان بۆتون.
اودور کی، فارس ائلی آیاغا قالخماز
ایمپریالیزمدن حاقینی آلار.
قووارلار زینداندان «خان»ی مئشهدن،
قاچا بیلمز تۆلکو بیر ده مئشهدن.
او گۆن دوستلاریمیز بیزی اونوتدو،
گؤردولر نهدنسه هاوا بولوتدو.
قارا کئجه گلدی، گؤرونمهدی آی،
دۆشمانلار شهره سالدیلار هارای.
یاد الینه دۆشدو شهرین آچاری،
اوغرو ایستر البت شولوق بازاری.
تالاندی یوردوموز، یاندی کیتابلار،
شاعیرلریمیز آه، اولدو گیریفتار.
اؤلن اؤلدو او گۆن، اؤلمهین قاچدی،
قارا زیندان خلقه آغزینی آچدی...
بیر گئجهده سؤندو یانار اوجاقلار،
قاپیلدی گنج قؽزلار، اؤلدو اوشاقلار.
بیزیم ائللرین آه، طالعیی دؤندو،
یانار داغیمیزین آتشی سؤندو.
باشا چاتدی «پاییز»، یارپاق تؤکولدو،
چوخ باشلار کسیلدی، قارین سؤکولدو.
دۆشمانلار کئچمیشیمی یادینا سالدی،
ائلخانلار آجیغینی بیزلردن آلدی.
سسینی چؽخارتمادی گؤرن آل قانی،
آسانمی اؤلدورمک، قؽرخ مین اینسانی؟
«قانلی حادثیه»دن کیملر سئویندی؟
قؽرمیزی دون گئین نامرد جلّادلار.
— بو گۆن او آن ایسه کیملر سئوینیر
— آرپایا جۆردهیین، حیلهگر یادلار
سئویندی کیملر؟ خاین مأمورلار،
ساوادسیز «اوستادلار»، اسکی فراشلار.
یاد دوستو «شاعیرلر»، قولدور حاکیملر،
بیر سوغانا یۆز باش کسن او باشلار،
داها کیملر، داها کیملر سئویندی —
خلقی تالایانلار، یورددان کؤچنلر،
اؤز اسیر ائلینه شاللاق وورانلار.
قؽزیل پیالهده آل قان ایچنلر
— کیملر سئوینیرلر «قانلی پاییز»دا؟
تۆلکو اینگیلیسلر، تاجیر یانکیلار.
داها کیم سئوینیر بو قانلی گۆنده؟
یاد الیله تخته چؽخان حؤکمدار.
بو گۆن سئوینن، صاباح دؤیولر،
بولودلار چکیلیب، گۆنش گؤرونر.
میلّت حقین آلار، دۆشمنین قؽرار،
دییشر البت کی، بئله رۆزوگار.
یانار گۆنلرین ده عؤمرو آز سۆرر،
گۆل آچار یوردوموز، گۆنوموز گۆلر،
بو «یاس گۆنو»بیر گۆن توی اولار بیزه،
قونشو ائلیمیزدن گلر ائلچی تبریزه،
اوشاقلاریمیز اوخور آنا دیلینی
شاعیر ده آلقیشلار آذر ائلینی.