قارانلیق گئجهده توفان قوپارکن
ایلدیریم تک نهدن چاخمادین گؤزل؟
بوروجو دؤنرکن آیریلیق گۆنو
نه اۆچون آرخانا باخمادین، گؤزل؟
اوزون گئجهلر آه سنی گؤزلهدیم،
سحر قوشلاریله سنی سسلهدیم،
باغچامدا نسترن گۆلو بسلهدیم،
دورو بولاق اولوب آخمادین، گؤزل؟
بۆروندون ایپگه، بزندین گلین،
بولاغا قؽرمیزی ایشیق الهدین.
آی کیمی گئجهنی گۆندوز ائلهدین،
بیر تک چؽراق الده یاخمادین، گؤزل؟
دفتریمده سنه ناخیشلار ووردوم،
مئشهلر ایچینده آلاچیق قوردوم.
نهدن باغیمدا ائی قارا گؤزلو «روم»
ساچلارینا بیر گۆل تاخمادین، گؤزل؟