قار یاغیب اۆستومه، قارا آغاجام
اسمهیینجه یئللر، قاتلار تؤکولمز.
قونوبلار قارغالار باشیما آخشام،
آغیردیر، آخشامین دردی چکیلمز...
گۆنباتانا ساری اوزانیر یوللار
یوللارین سونوندا قانلی دیار وار.
گئجهلر اورادا بایقوشلار اولار
خزانی یاسلیدیر، باهاری گۆلمز.
قارا توفان سالیب یئنه های-هویو،
باغلاردا تیکانلیق، یوللاردا قویو.
زهرلنیب چوخدان چایلارین سویو،
زهرلی چایلارین سویو ایچیلمز.
مشریقده سیتمین تندیری یانار،
شاعیر درویشلیگی سلطنت سانار،
قارا سئله آنجاق داغلار دایانار،
نامردلره مردین باشی اییلمز.
اۆستومه قار یاغسا گۆنش اریدر،
شیمال یئلی یئری گۆلوستان ائدر.
یاد ووروب ائللره قارا لکهلر
گؤز یاشیله بوررجا لکه سیلینمز.