پاییز

پاییز چاتیب، بوستانلاری پوزوبلار،
قؽزیل سویا بویانیبدیر گؤی چینار.
سئل سولاری یئنه آخیر داغلاردان،
قوشلار کؤچوب گئدیب بیزیم باغلاردان.
ائشیدرکن پولدان، ایشدن وار خبر،
آج قالانلار شهرلره کؤچورلر.
شهرده‌کی آجلیق چکن آز دئییل،
ایندیده‌کی ایستی هاوا، یاز دئییل.
مسجیدلرده یاتار گئجه قوناقلار
هر گئجه‌ده اؤلور بیر چوخ اوشاقلار.
حئیدربابا، باخ باغلاردا یئل اسیر،
مئشه‌لرده قودوز قوردلار یول کسیر.
پالچیق ائولر بیر-بیرینه سؽخیلیب،
بیر پاراسی یئلدن، سئلدن یؽخیلیب.
ائولر سوسموش، سویویوبدور اود اوجاق.
یئنه هاچان هاوا، رۆزگار اولاجاق؟
لاکین «بابا» هاوا یئنه قؽزیشار،
یاشیللانار قارا چمن، گؤی چینار.
قوشلار یئنه یوردوموزا دؤنرلر،
یاد ائللرده قارا گۆنلر گؤرنلر.
یئنه گۆنش ایشیق سالار سولارا،
بوغدا بیتر، گلر آغاجلار بارا.
آیدین شفق گۆلر بیزیم اؤلکه‌یه
داستان اولار هیسلی داخما، هم پیه.
اوندا سن ده اوزاقلاردان صبح ائرکن
چیچکلنمیش «خوشگیناب»ی گؤررسن.
اؤز یئرینده بوغدا، پامبیق اکنی،
بیزلر اۆچون قؽزیل خیرمن دؤینی.
قارا گۆنون عؤمرو «بابا»، آز اولار،
ظۆلمون اودو سؤنوب، گۆلو تئز سولار.
اوندا سنه من قوشماجا قوشارام،
آخار چای تک هم آشارام، جوشارام.