دالغالار قابارمیش

خاطیرات دفتریندن

دالغالار قابارمیش، آچیلمیش گۆللر،
صبحون هاواسیندا، سو پرده‌سینده.
دویولور فراقین غملی آهنگی،
آغیر-آغیر اوچان قوشلار سسینده...

چاملیقلاردان اسن ایلیق نسیمین
ایپک قانادلاری اوخشاییر منی.
اونون صاف نفسی انگین دنیزده،
سولاری قاباردیب، آچیر یئلکنی.

اۆفوقلردن دوغان قؽزیل گۆنشین،
زۆمرود سولاردا اریر کؤلگه‌سی،
گمی اوزاقلاشیر، اوزاقلاشدیقجا...
صدفلی ساحیلین کسیلیر سسی...

صدفلی ساحیللر، یاشیل اورمانلار،
ساحیلده تک قالان ساریشین نیگار.
سولار آییرسا دا منی سیزلردن،
مین خاطیره منی سیزلره باغلار.

دالغالار قابارمیش، سولار کؤپورموش،
قؽریلمیش یئلکنین ایپک قانادی!
قوشلارلا برابر ماوی شرقدن،
گلیریک سنه، ائی گۆللنن باتی!

ائی گۆللنن باتی! سارالیر رنگین!
گۆموش ساحیللرین گلیر نظره...
سندن دوغان آیین ایلک ایشیقلاری،
داملا-داملا دۆشور، سولار اۆزره...

سولار چکیلمیشلر، دنیز قوشلاری،
قوملاردا قالان اؤز روزوسون آرار،
سولار چکیلمیشسه، کاینات سوسموش،
کؤنولده حسرتلر اولورلار بیدار...