خزانلار

خزان چاغی
قؽزیل گۆنش اودلانیبدیر،
آغاجلارین یارپاقلاری
مین بیر رنگه بویانیبدیر...
هر یارپاغین بیر رنگی وار،
سئودا رنگی،
حسرت رنگی،
توتقون، توزلو،
غۆربت رنگی...
خزان چاغی، یئل اسرکن
یاغیر یارپاق،
اؤلگون یارپاق.
قالانیبدیر، قالاق-قالاق.
یوللار اوزاق، گؤللر درین،
نسیم اسیر سرین-سرین.
داغلار بیزیم، باغلار بیزیم،
یئری‌یرکن یارپاق اۆسته
قالماز ایزین...
گۆن یاندیرماز،
سون باهاردیر،
سانکی آغاج یارپاقلاری،
لاجیورددی بیر متنده
نقّاشلاردیر.
بیر چوخ خزان گلیب، کئچدی...
بیر چوخ کاروان قونوب کؤچدو.
بیر خزاندا
یئتیم قالدیق.
بیر خزاندا
سئودالاندیق.
بیر خزاندا
آلوولاندیق.
ان نهایت،
خۆلیالارین هاواسیندان
قانادلاندیق.

بیر خزاندا
پارلاق قؽزیل گۆنش دوغدو.
بیر خزاندا
بولود گلیب گۆنو بوغدو...
آنلایارکن خزانلاری
زامان بیزی قووالادی...
گلدی زامان، کئچدی زامان...
آیری دۆشدوک یوردوموزدان.
حسرت قالدیق
سرین-سرین بولاقلارا
گۆل-چیچکلی اوتلاقلارا.
زامان کئچدی، بیز قورودوق
سوسوز قالان آغاجلار تک.
طراوتدن سالدی بیزی،
بیلمم غۆربت؟
یوخسا فلک؟