من بیر لیریک شاعیر ایکن
«گئجه یاتماز» شعر یازار.
«عشقین» یئددی شهرینی
سئیر ائدهرک یولدان آزار.
بولودلاردا دولاشاراق
یئرده خلقی گؤرمز ایدیم.
دارالارین شرابیندان
ایچمیش ایدیم، ایچیم-ایچیم.
خیال منه گؤسترردی
«یاشیل باغ»ین قاپیسینی.
ائللر ایچره گزمز ایدیم
گؤردوم خلقین یاپوسونو.
دۆنیا منه گۆموش رنگلی
بیر سراب تک گؤرونردی.
دلی کؤنلوم اۆفوقلرده،
بیر قوش کیمی سۆرونردی،
گئجه واختی «سایهلر»له
ائدر ایدیم راز و نیاز،
عۆصیان مارشی اوخورکن خلق،
من چالاردیم باشقا بیر ساز.
بیر آل گۆنش دوغدو سحر
آذر یوردو چیچکلندی.
من ده بیر آز اویاناراق،
گؤردوم ائلی، گزدیم کندی.
قوپدو توفان، جوشدو سئللر،
سۆروکلهدی دۆشمانلاری،
قوودو قوردو قووار کیمی
آغ اینسانلار خاقانلاری.
من ده قوشدوم گۆنه ساری
خلقین دردین گؤروب یاندیم.
او گۆنهدک گؤرمهدیگیم
بیر چوخ شئیلر گؤروب قاندیم.
بیلدیم کی، خان دۆشمانیدیر
زحمت چکن اینسانلارین.
بیلدیم کیملر باعیثیدیر،
هدر آخان آل قانلارین.
بیلدیم کی، خان پناهیدیر،
سؤودگرین، فئودالین
بیلدیم نهدن گزر ایشچی
قؽش چاغیندا آیاق یالین؟
بیلدیم «غزل یازان شاعیر»
حقیقته پرده چکر.
خلقین شیرین شربتینه
نامردلیکله قاتار زهر.
من ده یازدیم ائللر اۆچون
اوخوسونلار اوغلان و قؽز
لاکین توفان قوپدو نهدن
کؤلگهلندی داغلاریمیز.
تخته چؽخدی یئنی فیرعون
آغیز آچدی زیندان بیزه.
گلدی جلّاد سۆرولری،
هم اورمیه، هم تبریزه.
اؤلدوردولر جاوانلاری،
یاندیردیلار تایالاری.
قؽرغین دۆشدو ائل ایچینه،
آج قالدیلار قوجا، قاری.
اؤلوم چؤکدو بیر بولود تک
دریا-دریا قانلار آخدی،
ایمپریالیزم خان الیله
بیر چوخ یوردلار باسیب یاخدی.