اوتور ائوده

اوتور ائوده، بۆرون کۆرکه
داغدا واردی بوران، شاعیر.
قاراباغدا خالان وارمیش،
خالان سنه قوربان، شاعیر.

ایشیق گؤردون او تایلاردا
سن ده سؤنوک چؽراق یاخدین.
گۆندن یانان زمی گؤردون
بولود اولوب، شیمشک چاخدین.

بیلیرسن کی، یوردوموزدا
قؽوریلیبدی یاد اژداها.
نه‌دن بیزیم شهری حریف،
«بلا گردن» ائتدین شاها؟

ایللر بویو یورددان اوزاق
آزدیرمیشدی شئیطان سنی.
ائی یاراماز، سنی دویدوم،
گیروو قویدون گر وطنی.

او تایلیلار سازین دؤیدو
تۆرک دیلینده سؤزون گؤردو.
بو تایداکی ائللر عیسی
آیدین «ایکی اۆزون» گؤردو.

دویدوم طبعین گۆللنیبدیر،
بیزیم دیلده قوشمان بولدو.
آغلایاراق دئمیسن کی:
«گؤز یاشیمدان آراز دولدو».

هانسی آراز؟ او آراز کی،
غرق اولوبدو قیزیل قاندا.
او آراز کی، قان آغلامیش
فریدونلار آسیلاندا.

گئت، آشنالیق قاتما آرتیق
یاد سنیندیر، سن ده یادین.
یاسلی پاییز اۆز وئریرکن
جلّادلاری آلقیشلادین.

بوراخ آشسین، داشسین آراز،
سن گئت شاها مدحیّه یاز.
ائل دۆشمانی، دیل دۆشمانی
گل آلداتما ائل-اوبانی!