آنام اۆچون

یئلکن اؤپوشو تک قورو یاپراغین،
سۆکوتو تیترتدی، دورغون سولاری،
چمنلرده اؤتن قوشلارین سسی،
اویاتدی کؤنلومده‌کی دویغولاری.

بیر خیال سۆزولدو، آغاجلیقلاردان،
سولار اۆسته دۆشوب، کؤلگه تک سولدو.
کئچن باهارلارین رنگلری آرتیق
اۆرگیمده آجی خاطیره اولدو...

کئچمیش گۆنلر پرده‌لندی، حیاتیم
بیر افسانه کیمی، منه گؤروندو.
منی سئون آنامین، خیالی، آه!
بیر شبح کیمی، یول اۆسته سۆروندو...

سۆرون ائی خیال! سن ائی کؤلگه، سۆرون!
توزلو یوللاردا، آی ایشیغی تک!
قال تورپاق آلتیندا، آنا، تورپاق اول!
تورپاغیندا یئتیشسین قان رنگلی چیچک.