گۆموش کؤلگه سالیب قارلار اۆزکره،
آسیماندا بۆللورلانان دونوق آی،
دۆنیا سوسموش، ائشیتدیلر مئشهده،
گئجه واختی گوروولدایان آخار چای.
افسونلامیش آی دۆنیایی بو گئجه
یئر، گؤی مبهوت، اونون سسین دینلهییر،
هر شئی ساکیت، لاکین منیم اۆرگیم،
ساکیتلیکده بیر ساز کیمی اینلهییر...
افسونلارسا آی عالمی، کؤنلومو،
آنجاق اونون باخیشلاری افسونلار!
من سوسمارام، دۆنیا بۆتون سوسارسا،
مشغول ائتمز منی مگر نازلی یار.
گۆموش کؤلگه سالیب گئجه مهتاب،
لاجیوردی آسیماندان یئرلره...
قارین ایپک پردهسینده گیزلنمیش،
چاییر، چمن، دۆزنلیکلر، داغ، دره.