زامانین سیرّی

یئنه گؤوردی اوت،
ساری گۆل آچدی.
یۆکون چاتدی، زامان
گئجه‌یلن قاچدی.

قووالارکن گئجه
هر گۆن گۆندوزو
سۆرونن بیر عؤمرون
قالمادی ایزی.

اسکی ایللر منی
یورددان چؽخارتدی.
مین ایل گئدن اوّل
کاروانا چاتدی.

پوزموش ایدی زامان
بیر ایله یاخین،
اۆزومون، گؤزومون،
گؤزل ناخیشین.

اؤزومو اینادا
تانیمادیم،
کیم ایمیشم من، عجبا!
نه ایمیش آدیم؟

باغلار دئدی: — شاعیر،
نه تئز قوجالدین.
داغلار دئدی: — یازیق،
پیس گۆنه قالدین.

نه اۆچون سولوبسان،
سوروشور گۆنش،
بوم‌بوز اولوبسان، باخ! —
دئییردی آتش.

یۆنگوللتدی منی
او قدر فلک.
ترپدیر یئللر
سامان چؤپو تک.

قؽزدیرماییر منی
نه اود، نه اوجاق،
ساری ایشیق کیمی
گؤرونور چؽراق.