باتبات یئین اوشاقلار

عقرب یوواسی، پالچیق ائولرده،
داش عصریندن قالما اییرنج یادیگار،
اؤلومو گؤزله‌ین، حیاتدان ‫مأيوس،
بیر اوووج آج، چؽپلاق کندلی یاشایار.
هله سؤکولمه‌دن داغدا دان یئری،
تاختا قاپیلاری گۆنش دؤیمه‌دن
تۆستولر پیه‌لر، سس-صدا قوپار،
چؤله گئدن اولور، ناخیرا گئدن.
دولوب بوشالیرکن بولاق باشلاری
اینکلر، بوزوولار سولاردان ایچر.
دۆنیایا گلیرکن یئنی یولچولار،
اسکی یولچولار دا دۆنیادان کؤچر.
آنالار اللشر شیرین جان اۆسته،
یولدان کئچنلری چاغیرار داغلار.
هر یئرده گؤرونر جینلی، دوعالی،
زهرلی «باتبات»دان یئین اوشاقلار.

دؤولتلی اوشاغی یئییرکن قؽشدا،
پورتاقاللا آلما، آناناس، بانان،
کندلی اوشاقلاری مئیوه دادمازلار.
اونلارین مئیوه‌سی باتباتدی اینان...
حاکیملر بورادان آتینی سۆرمز،
آجیندان «قورودو قاپانی» گؤرمز.
بیزیم یئرده خاقان دییشمه ائدر،
کندلینی سویوب دا زنگینه وئرر.
باسیلارکن کیتاب، سۆسلو زرنیگار،
آلتین دیاریندا خاتون سس سالار.
هیسلی داخمالاردا اکینچی چۆرور،
اؤلکه‌نین شؤهرتی دۆنیانی بۆرور.