سؤیله، تانری

سؤیله، تانری، بو بوش قالان یوللاردان،
گئجه واختی کیملر کئچدی، کیم قالدی؟
یاری-یاردان هانکی اللر آییردی،
ائل ایچینده آیریلیغی کیم سالدی؟
مین امکله چیچکلنن یوردوموز،
بیر گئجه‌ده نه تئز سولوب-سارالدی؟

ائللر کؤچوب، یوردلار اولدو ویرانه،
بو یئرلری سۆرن، اکن هاردا بس؟
خزان اولموش مئشه‌لرین ایچیندن،
ائشیدیلمز نه بیر صدا، نه بیر سس...
حیاتیمیز، او گۆل آچان حدیقه،
سراب ایمیش، — یوخسا تانری، بوش هوس؟

شاختا دۆشدو، دومان باسدی داغلاری،
عائله‌لر ماتملره بۆروندو.
او یئردن کی، ایلیق یئللر اسیردی،
توفان قوپوب، آجلیق، اؤلوم گؤروندو.
گؤزل قؽزلار، کیچیک، کؤرپه اوشاقلار
قاپی-قاپی دیلنه‌رک سۆروندو...

سؤیله، تانری، کؤچوب گئدن ائللرین،
بو دۆنیادا بیر ده اۆزو گۆله‌جک؟
گله‌جگه شیرین اۆمید بسله‌ین
کؤنلوموز آچاجاقمی، گۆل-چیچک؟
ویرانه‌ده سوساجاقمی بو بایقوش،
وئره‌جکمی باهار، دۆنیایا بزک؟