منو
نئجه‌سن گل، ائی یۆزو آغیم بنیم؟
نئجه‌سن گل، ائی یۆزو آغیم بنیم؟
سن اریتدین اودلارا یاغیم بنیم.
آند ایچیرم سندن آرتیق سئومه‌ییم،
سنین ایله خوش کئچر چاغیم بنیم.
حۆسن ایچینده سانا مانند اولمایا،
اصلی یوجا، کؤنلو آلچاغیم بنیم.
آل الیمی ایرییم مقصودیمه،
قویما یۆرکده یانا داغیم بنیم.
سن رقیبه سیرّینی فاش ائیله‌دین،
آنون ایله اولدو شؽلتاغیم بنیم.
قؽشلادیم قاپیندا ایتلرین ایله،
اولدو کویین اۆشته یایلاغیم بنیم.
بن اؤلوجک یولونا گؤمون بنی،
باقا دورسون یاره توپراغیم بنیم.
توپراغیمدا بیته حسرتله آغاج،
قؽلا زاری ج‍ۆمله یاپراغیم بنیم.
بو حسن‌اوغلو سنین بنده‌ندورور،
آنی رد ائتمه یۆزو آغیم بنیم.