منو
خدا حافظ!
نه دن دیرسنده ایلنمز گول دؤوران، خدا حافظ!
منه هم گلدی گئتمک نؤوبتی، یاران، خدا حافظ!
جاهاندا اولمادی بیر دم گؤره یدیم ماه روخسارین،
نه قدری جهد قیلدیم اولمادی امکان، خدا حافظ!
نه چون سن ترک مهر ائتدین، وفادان ال چکرلرمی؟
مگر عهده وفا ائتمز شه خوبان، خدا حافظ!
رقیبلر قویمادی یئتسین الیم بیر دامن وصله،
خیالینله کئچیردیم عمرومو نالان، خدا حافظ!
نه صبر و طاقتیم قالدی، نه عقل و هوش بالمره،
اونون چون چشم پر خونیم اولور گریان، خدا حافظ!
او گون کیم، محشر کبرا اولور، وهم ائت او گوندن کیم،
توتام دامانینی، دیلدن چکم افغان، خدا حافظ!
اوزوب ال ناتوان جاندان کی، تا اومید وصل ائتمز،
دیل غمگین، جیگر پر خون، اولوب سوزان، خدا حافظ!