یخیب بو کؤنلوم ائوین

یخیب بو کؤنلوم ائوین، ایله‌ییب ویران، گئتمه!
یوخومدو تاب و توان فرقتده، جاوان، گئتمه!

فدا اولوم سنه من، سندن آیریلا بیلمم،
یقین، فراغین ائدر قدّیمی کامان، گئتمه!

سنینله رؤرشن ایدی قلبیم، ای گؤزوم نوری!
گومان کی تنگ اولا بو جانیما جاهان، گئتمه!

بویون بلاسین آلیم، سرو تک ییخیلما، اوغول،
دویونجا گؤرمه‌میشم گئتمه بیر زامان، گئتمه!

چیخایدی کاش گؤزوم، گؤرمه یه یدی هیجرانین،
اؤلونجه، بیل، ائدرم ناله و فغان، گئتمه!

صاباحاتک اوتوروب چکمیشم جفالرینی،
بویوم برابری سن ایندی، الامان، گئتمه!

یقینا ال چکجک دوست و آشنالردن،
ده لی کیمی دوشه جک چؤللره آنان، گئتمه!

سنینله کیم، آچیلیب قلبیمین شوکوفه لری،
مروّت ائیله، عزیزیم، ائدیب خزان، گئتمه!

دی یومما گؤزلرینی، قوی گؤروم دویونجا سنی،
گؤزومده جاری ائدیب اشک، هم روان، گئتمه!

ترحم ائیله منه، درد و موحنتیم چوخدور،
قویوب بو هیجر بلا ایچره ناتوان، گئتمه!