شاد اولان کؤنلوم

یئنی یا رب، نه غمگین دیر بو شاد اولان کؤنلوم،
رموز عشقیدن آگاه اولوب، اوستاد اولان کؤنلوم.

گؤروبدور یاری اغیاره اولوبدور محو نظاره،
ائدیبدیر سینه سین پاره، منیم آباد اولان کؤنلوم.

نییه پیمانه دن کئچدین، نییه زنجیریدن قاچدین؟
نه دن دیر چؤللره دوشدون، منیم برباد اولان کؤنلوم.

فراقین روز محشردیر، سراسر موحنت غم دیر،
او زولفون کیمی درهم دیر، منیم آزاد اولان کؤنلوم.

باخین بو ناتوان زاره، گونو بختیم کیمی قاره،
گزر مجنون تک آواره، منیم ناشاد اولان کؤنلوم.