دایم سنین نار فراقیندا

یانار جانیم، اوغول، دایم سنین نار فراقیندا،
نئجه پروانه‌لر هر دم یانار شمعین آیاغیندا.

گول رویون هواسی له چیخار افلاکه افغانیم،
اودور بولبول نواسی گول فراق و اشتیاقیندا.

نهال قامتین ذکری منیم ویرد زبانیم دیر،
دمادم نالۀ قمری اوخور سروین بوداخیندا.

او شیرین لبلرین شؤوقو گونو – گوندن اولور افزون،
اگر فرهاد تک یوز ایل دولانسام هیجر داغیندا.

حریسم بس کی، او شیرین زبانین ذکرینه هردم،
اولور خوش نطق لی طوطی، شکر اولسا داماغیندا.

سنین هیجرین اودو، عباس، دخی، چیخماز کی، جانیمدان،
سمندر تک یانار دایم آنان نار فراقیندا.

اوچوب شاهباز تک کؤنلوم، گزردی وصل باغیندا،
پر و بالینی سیندردی فلک، بو پیر چاغیندا.

گؤزومده تاردیر دؤوران، مه و خورشید نور افشان،
محاق ایچره اولوب پنهان، ساناسان چرخ تاغیندا.