گۆلوشلر

گۆلوش واردیر سسلرینه تونج عکسلر یاپدیریر،
گۆلوش واردیر کؤنوللری روزگارلارا قاپدیریر.
بعضی تیکر کؤنوللرده آلوولاردان بیر معبد،
ایللر بویو آتشینه اینسانلیغی تاپدیریر.

بۆرونه‌رک چوخو ایپک فۆسونلو بیر چارشافا
ساچیر بۆللور تبسّوملر، ایلنجه‌لر اطرافا.
او پرده‌یی پارچالاساق جان آتاریز نهایت
و باشلاریز گؤز یاشلاری عالمینی طوافا.

گۆلوش واردیر دوداق‌آلتی، گۆلوش واردیر مۆستهزی،
زنجیرله‌یر اوچانلاری حالقالاندیقجا بعضی،
بعضی سؽجاق گؤروشلره دوغرو یوللار گؤستریر.
فقط اونون گۆلوشلری بیر قؤنچه‌یه یاسلانان

رنگسیز پارلاق ژاله‌لردن نۆمونه‌دیر، هر زامان
گنج عؤمرومه یۆکسلمک‌چین قاناد وئریر، جان وئریر.