بو چرخی-فلک ترسینه دؤوران ائدیر ایمدی،
فعله ده اؤزون داخلی-اینسان ائدیر ایمدی.
اولماز بو کی، هر امره دخالت ائده فعله،
دؤولتلی اولان یئرده جسارت ائده فعله،
آسوده نفس چکمهیه حالت ائده فعله،
یاینکی حقوق اۆسته عداوت ائده فعله؛
بو چرخی-فلک ترسینه دؤوران ائدیر ایمدی،
فعله ده اؤزون داخلی-اینسان ائدیر ایمدی.
فعله! منه بیر سؤیله، ندن حؤرمتین اولسون؟
آخیر نه سبب سؤز دئمهیه قۆدرتین اولسون؟
ال چک، بالا، دؤولتلیلره خیدمتین اولسون،
آز-چوخ سنه وئردیکلرینه میننتین اولسون!
بو چرخی-فلک ترسینه دؤوران ائدیر ایمدی،
فعله ده اؤزون داخلی-اینسان ائدیر ایمدی.
دؤولتلی، آماندیر، اؤزونو سالما بلایه،
فعله سؤزو حق اولسا دا، باخما او صدایه،
یول وئرمه نفس چکمهیه هرگیز فقرایه،
اؤز شأنینی پوچ ائیلمه هر بیسرو پایه!
بو چرخی-فلک ترسینه دؤوران ائدیر ایمدی،
فعله ده اؤزون داخلی-اینسان ائدیر ایمدی.
آلدانما، فقیرین اولاماز عقلی، ذکاسی،
چۆن یوخدور اونون سن کیمی پاکیزه لیباسی،
یوخ ثروتی، یوخ دؤولتی، یوخ شالی، اباسی،
وار کؤهنه چوخاسی، دخی بیر تکجه قباسی؛
بو چرخی-فلک ترسینه دؤوران ائدیر ایمدی،
فعله ده اؤزون داخلی-اینسان ائدیر ایمدی.
ایسترسن اگر اولماغا آسوده جهاندا،
Та اولمایاسان غملره آلوده جهاندا --
فعله اۆزونه باخما بو بیهوده جهاندا،
اؤز فیکرینی چک، اول دخی فرسوده جهاندا؛
بو چرخی-فلک ترسینه دؤوران ائدیر ایمدی،
فعله ده اؤزون داخلی-اینسان ائدیر ایمدی.
گؤر ملّتینین دردینی، آختارما دواسین،
ال چکمه یئتیمین باشینا، کسمه صداسین،
زینهار قویوب دهرده بیر خئیر بیناسین
یاد ائیلمه، شاد ائیلمه ملّت فقراسین....
بو چرخی-فلک ترسینه دؤوران ائدیر ایمدی،
فعله ده اؤزون داخلی-اینسان ائدیر ایمدی.