کؤنلوم بولانیر کۆچهده جؤولانینی گؤرجک،
نیطقیم توتولور هرزه و هدیانینی گؤرجک.
جانیم اۆزولور الدکی قالخانینا باخجاق،
قلبیم آلیشیر بئلدهکی پاترانینی گؤرجک.
باخدیقجا رئوولوئرینه اندامیم اولور سۆست،
باغریم یاریلیر خنجری-بۆررانینی گؤرجک.
تفریق ائدمم: مستمی، هۆشیارمیسان سن،--
مستانهرویش، مشیی-پریشانینی گؤرجک.
دۆشدون لوتولوق مشقینه، ایسلاما اویوشما،
اؤلدور نئرهده اولسا مۆسلمانینی گؤرجک.
قوی بؤرکونو کج قاشینین اۆستونده، فؽریلدا
کندین کیمی بیر لوتیی-میدانینی گؤرجک.
مست اول گئجه-گۆندوز، نه بیلیم، یات نئرهلرده،
یوم گؤزلرینی خانهیی-ویرانینی گؤرجک.
امردلر ایله کئیفینی چک باغدا، چمنده،
بیر باخما دا اطفالی-جیرقانینی گؤرجک.
گاه "ایسکوروخود" چکمه، گهی گئی "لاکوروننی"،
وئللن گئجه-گۆندوزده خورامانینی گؤرجک،
وار-یوخونو صرف ائیله باریشنالارا، آنجاق
سؤی همسری-مظلومهیی-نالانینی گؤرجک.
گۆل، گۆل کی، جاوانسان،
عیّاشی-جهانسان،
سرخوشلارا جانسان!
واختا کی، قوجالدین،
ریشی دؤشه سالدین،
پیس گۆنلره قالدین
اوندا بیلجکسن!....