اما، ملّت آ!...

مولدایی، گؤردون نه اقدام ائتدی؟! اما، ملّت آ!....
آز زامان‌دا نه سرانجام ائتدی؟! اما، ملّت آ!....
اؤز گۆجون هر قومه افهام ائتدی؟! اما، ملّت آ!....
وارلیغین مردانه اعلام ائتدی؟! اما، ملّت آ!....
مولدایی، گؤردون نه اقدام ائتدی؟! اما، ملّت آ!..

باس‌دی، کئچ‌دی اهلی-ایران قاتلادی هر ملّتی،
بیل‌دی قدرین، آلدی حاقین، قووزادی میللیتی،
آلدیغی مشروطه‌نی پارلات‌دی پارلاق غیرتی،
احسن-اۆللاه، همتی-تام ائتدی؟! اما، ملّت آ!....
مولدایی، گؤردون نه اقدام ائتدی؟! اما، ملّت آ!....

ایش باشین‌دا ایلشن کسلر خیانت‌دن سوا،
وای، یانیلدیم، قوی دئییم، هه، لاپ صداقت‌دن سوا
ائتمز اولدو بیر نفر اولسون دا خیدمت‌دن سوا،
وار-یوخون هپ بذلی-ایسلام ائتدی! اما، ملّت آ!....
مولدایی، گؤردون نه اقدام ائتدی! اما، ملّت آ!....

عقل حیران‌دیر کی، سای‌سین بیر-بیر احرارین ایشین،
قانماق اولمور، آنلاماق اولمور سیپهدارین ایشین،
یئفرئمین، یا باقرین، یاینکی ستّارین ایشین،
مرحبالار! وه، نه انجام ائتدی! اما، ملّت آ!....
مولدایی، گؤردون نه اقدام ائتدی؟! اما، ملّت آ!....

ائیله‌سین ستّارو باقر باشقا بیر ایما، نئچین؟
یا حکومت ائیله‌سین احرارله دعوا، نئچین؟
قانمیرام، القصّه، سرداری-باهادیر یا نئچین
باقری تسلیم سمسام ائتدی؟! اما، ملّت آ!....
مولدایی، گؤردون نه اقدام ائتدی؟! اما، ملّت آ!....

گئت، داها اول آرخایین، یات، ائیلمه سرسم، کیشی!
پارلادی، میدانا چؽخ‌دی ملّت، ائتمه غم، کیشی!
قوی بیزی تقدیر ائدیب ده سؤیله‌سین عالم، کیشی،
ایکتیسابی-عزتی-نام ائتدی! اما، ملّت آ!....
مولدایی، گؤردون نه اقدام ائتدی؟! اما، ملّت آ!....